Шавкат Мирзиёевнинг Наманганга ташрифидан сўнг вилоят прокурори ишдан олинди

Шавкат Мирзиёевнинг Наманганга ташрифидан сўнг вилоят прокурори Улуғбек Тошев ишдан олинди. Бу ҳақда «Дарё» манбаси хабар бермоқда.

Улуғбек Тошев 2018 йил апрелида Наманганда иш бошлаган, бундан аввал Самарқанд вилояти прокурорининг биринчи ўринбосари бўлганди.

Давлат раҳбари Наманганда бўлиб ўтган фаоллар йиғилишида Наманганда жиноятчиликни олдини олиш бўйича ҳолатдан норозилик билдириб, жиноятчиликни жиловлаш зарурлиги, бу борадаги кўрсаткичлар йил охирига қадар ижобий томонга ўзгариши кераклигини таъкидлаганди.

Ўзбекистон Бош прокурорининг ўринбосари Рашид Раҳматов Наманган вилояти прокурори этиб тайинланди.

Рашид Раҳматов 1978 йилда туғилган, маълумоти олий, ҳуқуқшунос. 2004 йилда Тошкент давлат юридик институтини тамомлаган.

Прокуратура органларидаги иш фаолиятини 2004 йилда Навоий шаҳар прокуратурасида бошлаб, Навоий вилояти прокуратураси органларида турли лавозимларда, 2009 йилдан Бош прокуратура бошқарма прокурори, катта прокурори, Бухоро шаҳар прокурори, Бош прокуратура бошқарма бошлиғи ўринбосари, бошқарма бошлиғи лавозимларида фаолият юритган.

2017 йил ноябрида Қорақалпоғистон Республикаси прокурори, 2018 йил ноябрида эса Ўзбекистон Бош прокурорининг ўринбосари этиб тайинланганди.