Фарғона шаҳрида жорий йилнинг 11—12 март кунлари Тожикистоннинг Сўғд вилояти ҳамда Қирғизистоннинг Ўш, Жалолобод, Боткен вилоятлари вакиллари иштирокида халқаро ёшлар фестивали бўлиб ўтади. Бу ҳақда «Дарё»га вилоят ҳокимлиги матбуот хизмати хабар бермоқда.
Фестивалда Ўзбекистон, Қирғизистон ва Тожикистон Республикаларининг чегарадош ҳудудларидаги давлат бошқарув органлари, ёшлар ташкилотлари, миллий-маданий марказлар, ҳуқуқни муҳофаза қилиш идоралари, диний соҳа вакиллари, экстремизм ва терроризмга қарши кураш йўналишида илмий-амалий тажрибага эга мутахассислар, талаба-ёшлардан иборат 200 нафардан зиёд иштирокчи қатнашиши кутилмоқда.
Халқаро ёшлар фестивалида «Марказий Осиё минтақасида экстремизм ва терроризмга қарши курашнинг долзарб масалалари» мавзусида ўқув семинари ҳамда «Биз келажакни биргаликда бунёд этамиз» шиори остида ёш олимларнинг инновацион ғоялари, тадбиркор ва ҳунарманд ёшлар ишлаб чиқараётган маҳсулотлар кўргазмаси бўлиб ўтади. Фестиваль иштирокчиларидан иборат жамоалар ўртасида «Дўстлик» кубоги учун мини-футбол, волейбол, стол тенниси бўйича мусобақалар ўтказилади.
«Истиқлол» стадионида фестиваль иштирокчилари ва 20 мингдан ортиқ ёшлар учун концерт дастури намойиш этилади. Тадбир иштирокчиларини Фарғонанинг туристик салоҳияти ва тарихий обидалари билан таништириш мақсадида вилоятнинг диққатга сазовор жойларига саёҳат уюштирилади.
Изоҳ (0)