Ўзбек футболидан ҳайдалган Самвел Бабаян Тошкентнинг «Локомотив» клуби президентига маслаҳатчи бўлди

Ўзбекистон терма жамоаси собиқ мураббийи Самвел Бабаян «Локомотив» футбол клубида фаолият олиб боради. Бабаян «Локомотив» профессионал футбол клуби президенти(Мансур Ражабовнинг) маслаҳатчиси этиб тайинланди. Бу ҳақда клубнинг расмий сайтида хабар берилди.

Клуб матбуот хизмати берган хабарда шундай дейилади:

«Футбол мухлисларига яхши маълум, Самвел Бабаян асосан «Пахтакор» футбол клубидаги бир неча йиллик фаолияти орқали кенг жамоатчиликка танилган. Унинг катта тажрибаси ҳамда ўзбек футболидаги самарали меҳнатини инобатга олиб «Локомотив» ПФК раҳбарияти ишга таклиф этди. Самвел Бабаян «Пахтакор»даги фаолияти давомида кўплаб ютуқларни қўлга киритган. У раҳбарлик қилган йиллари «Пахтакор» 9 бор мамлакат миллий чемпионати ҳамда 8 марта Ўзбекистон Кубоги ғолиби деб топилган. Бундан ташқари «Пахтакор»нинг икки бор (2002/2003, 2004) Осиё Чемпионлар Лигаси ярим финалига етиб боришида унинг ҳиссаси бор. 2002 йил мавсум якунларига кўра, Тошкент клуби унинг қўл остида «Осиёнинг энг яхши футбол клуби» деб топилган.

Шунингдек, МДҲ Кубогининг 2007 йилги мусобақасида чемпион бўлиши ҳамда кейинги йил финалга қадар етиб боришида қўшган ҳиссаси катта. Бундан ташқари Самвел Бабаян Ўзбекистон миллий терма жамоаси бош мураббийи сифатида ҳам меҳнат қилган. Шунингдек, Самвел Вячеславович турли йилларда Ўзбекистоннинг олимпия, ёшлар ва ўсмирлар терма жамоаларига «Пахтакор» менежери сифатида 200 га яқин футболчиларни тарбиялаб берган. Таъкидлаш жоиз, Самвел Бабаян икки бор Ўзбекистоннинг «Энг яхши мураббийи» деб топилган».

Маълумот учун, Самвел Бабаян ЎФФ (ҳозир ЎФА) Ижроия Қўмитаси Бюросининг 2018 йил 15 январдаги 3-сонли қарорига мувофиқ футболга алоқадор ҳар қандай фаолият билан шуғулланишдан умрбод четлаштирилган эди. Кейинроқ мутахассис Латвияда иш бошлагач, ташкилот бу қарорнинг фақат Ўзбекистонда амал қилишини маълум қилганди.