«Реал»га қарши 2 та ўйин кутиб турган «Барселона» «Рамон Санчес Писхуан»дан омон чиқа оладими? (превью)

Бугун, 23 февраль куни Каталониянинг «Барселона» клуби «Реал»га қарши иккита учрашув олдидан «Рамон Санчес Писхуан» стадионида «Севилья» меҳмони бўлади. Қуйида ушбу учрашувга оид маълумотлар ва қизиқарли фактлар тақдим этилади.

Бу шунчаки оддий ёки ўткинчи ўйин бўлмаслигини иккала жамоа ҳам яхши тушуниб турибди. Каталонияликларни Андалусияда ҳар доимгидек «ўта илиқ» тарзда қарши олишлари турган гап. «Севилья» бугунги баҳсда Ла Лигадаги барча муаммоларини унутиб, бор кучини майдонда беришга ҳаракат қилиши кутилмоқда. Боиси, клуб Европа Лигасида «Лацио»ни икки ўйин натижасига кўра, қийинчиликсиз енгди ва 1/8 финалга йўл олди. Энди эса Ла Лигадаги натижаларни ҳам яхшилаш вақти етди. «Барселона» устидан қозониладиган муваффақият эса Пабло Мачин шогирдларига яна ишончни қайтариши мумкин.

«Барселона» эса учрашувга бир мунча кўнглини хотиржам қилиб келмоқда. Клуб Ла Лига мусобақа жадвалида иккинчи ўриндаги «Атлетико»дан 7, учинчи ўриндаги «Реал»дан эса 9 очкога илгарилаб кетган. Аммо Каталония клуби устози Эрнесто Вальверде Испания Кубогидаги хатосини («Севилья»га қарши биринчи ўйинда иккинчи таркибни туширган ва жамоа мағлуб бўлганди) такрорлмасликка ҳаракат қилиши табиий ҳол. Ҳар ҳолда «Реал» билан ўйиндан олдин яхши кайфиятда бўлишдан на Вальверде ва на Мессининг жамоадошлари воз кечади.

Таркибдаги муаммолар ҳақида гап кетганда, «Севилья» сафида бироз каттароқ муаммолар борлиги кўринади. Нолито ва Эскудеро бугуни ўйинни аниқ ўтказиб юборади. Нолито жорий мавсум асосий таркибда кам кўриниш бераётган бўлса, Эскудеронинг йўқлиги билиниши мумкин. Аммо унинг ўрнини Куинси Промес билинтирмасликка ҳаракат қилиб кўриши мумкин. «Барселона» сафида эса Рафинья, Яспер Силлессен ва Артур майдонга тушмайди. Улар ичида фақатгина Артурнинг асосий таркиб ўйинчисилигини ҳисобга олинса, Каталония клуби катта хавотирга тушмаса ҳам бўлади.

Қизиқарли фактлар

• «Барселона» сўнгги 11 та ўйиндан 8 тасида дарвозасидан гол ўтказмади;
• «Барселона» «Севилья»га қарши 11 та ўйиндан 9 тасида ғалаба қозонди;
• «Севилья» ўз майдонида ўтган сўнгги 9 та ўйинда мағлубиятга учрамади;
• «Барселона» жорий мавсум учрашувларда 75-дақиқадан сўнг 16 та гол урди. Жами голларнинг 26 фоизини ташкил қилади;
• Томонларнинг Ла Лигадаги сўнгги 6 та учрашувидан бештасида «Барслеона» ғалаба қозонган.

Тахминий таркиблар

Учрашув ҳаками

Ўйинни Испаниянинг тажрибали ҳакамларидан бири Антонио Матео Лаос бошқариб боради. У 2018/19 йилги мавсумда 12 та ўйинни бошқарди. 58 та сариқ карточка кўрсатган. Битта ўйинда ўртача 4,8 та сариқни ўз чўнтагидан чиқаришга мажбур бўлган. Атиги 2 та қизил карточка кўрсатган. Битта ўйинда ўртача 25 та қоида бузилишини қайд этади.