Гомель ва Брест ҳудудларида тожик-беларус боғларининг барпо этилиши масаласи Тожикистоннинг Минскдаги элчиси Маҳмадшариф Ҳақдоданинг Беларусь ташқи ишлар вазири биринчи ўринбосари Андрей Евдоченко билан учрашув чоғида муҳокама қилинган. Бу ҳақда ASIA-Plus хабар берди.
Учрашув чоғида томонлар олий даражадаги ташрифлар, савдо-иқтисодий ҳамкорлик бўйича Тожикистон-Беларусь ҳукуматлараро комиссиясининг 13-йиғилиши, Беларусда Тожикистон маданият кунлари, шунингдек, 2019 йилда тожикистонлик ишлаб чиқарувчиларнинг маҳсулотлар кўргазмасини ташкил этиш масалаларига эътибор қаратди.
Жорий йилнинг май ойида Беларусь президенти Александр Лукашенко Душанбега амалга оширган расмий ташрифи чоғида Тожикистон президенти Эмомали Раҳмон билан тожик кўчатлари Беларусь тупроғида яхшигина илдиз отиши мумкинлиги ҳақида гапирганди.
«Наҳотки Гомел ва Брест вилоятларида биз бу экинларни етиштира олмаймиз. Бу навлар бизда ҳам яхши ўсишига ишонаман», — деган Беларусь президенти.
У Тожикистон президенти Эмомали Раҳмон шарафига иккита боғ барпо этишни ва бу эзгу иш учун ер ажратилаётганда қизғанчиқлик қилмасликни буюрди.
Тожикистон раҳбари беларуслик мутахассислар билан иш ташкил этишда ёрдам беришга ва керак бўлса кўплаб кўчатларни тайёрлашга ваъда берди.
Изоҳ (0)