19 декабрнинг асосий янгиликлари — «Дарё» дайжестида.
«Божалар» гуруҳи солисти Жаҳонгир Позилжонов Президент Шавкат Мирзиёевга атаб қўшиқ куйлади.
Хонанда клипида Президент расми олдида суратга тушиб, #SelfiMening Prezidentim хештеги билан ижтимоий тармоқларга жойлашни тарғиб қилган.
Клипда ўзбек эстрадаси вакиллари ва актёрлар иштирок этган.
***
Ўзбекистон Бош прокурори ўринбосари Эркин Йўлдошев Халқаро пресс клубнинг бугун, 19 декабрь куни бўлиб ўтган сессиясида Рашид Қодиров, Гулнора Каримова ва Абдусалом Йўлдошевларга нисбатан очилган жиноят ишларининг бориши ҳақида маълумот берди.
Эркин Йўлдошевнинг маълум қилишича, Ўзбекистон Биринчи Президентининг қизи Гулнора Каримова Ўзбекистонда жазони ўтамоқда.
«Гулнора Каримова суд ҳукмида кўзда тутилган жазони Ўзбекистон ҳудудида ўтамоқда», — дейди Ўзбекистон Бош прокурорининг ўринбосари.
***
АҚШ 2017 йилнинг декабрь ойида Гулнора Каримовага қарши жорий этилган санкцияларни узайтирди.
Санкцияларнинг узайтирилиши коррупцияда айблов ва инсон ҳуқуқларининг бузилиши билан боғлиқ «Магнит актига» мувофиқ амалга оширилмоқда. Трампнинг қарорига мувофиқ чекловлар яна бир йилга узайтирилади.
Турли мамлакат фуқароларидан таркиб топган 13 нафар фуқаронинг рўйхати АҚШ молия вазирлиги сайтида эълон қилинган. Ушбу рўйхатда Гулнора Каримова ҳам бор.
***
GM Uzbekistan 20 декабрдан 22 декабргача барча автосалонларда Cobalt LS М/Т (1-позиция) автомобилини харид қилиш истагида бўлганлар учун махсус Янги йил акциясини эълон қилди.
Акция давомида ушбу автомобиль учун 100 фоиз тўлов амалга оширган ҳар бир харидор 4 000 000 сўм чегирмага эга бўлади.
***
UFC бўйича мутлақ жаҳон чемпиони Ҳабиб Нурмагомедов нима учун октагонга Россия байроғи билан чиқмайсиз, деган саволга кескин жавоб қайтарди.
«Мен ҳар доим(байроқ билан) чиқаман. Экранда мамлакат байроғи кўрсатилади. Америкада Доғистон, Чеченистон, Кавказни билмайдиганлар мени рус ўғлони деб билади. Агар сезган бўлсанг, ҳатто хорижлик спортчилар ҳам, умуман ҳамма мени рус деб ўйлайди. Шу сабабли улар учун биз — бир миллатмиз, бир халқмиз. Энг муҳими, бизнинг халқимиз ажратилмаслиги. Масалан, сен кабилар томонидан.
Чет элда, ҳеч ким бизни ажратмайди. Бизнинг ажралишимизни хоҳлаганлар орамизда. Кел, яхшиси сиёсат ҳақида эмас, спорт ҳақида гаплашамиз. Агар сенда тузукроқ саволлар бўлса, беришинг мумкин», — деди Нурмагомедов «Ura.ru»га берган интервьюсида.
Изоҳ (0)