17 декабрнинг асосий янгиликлари — «Дарё» дайжестида.
«Ўзбекнефтгаз» бошқарув раиси Баҳром Ашрафхонов нималар ҳисобига мамлакатда бензин нархи тушиши ва унинг танқислиги бартараф этилиши ҳақида сўзлаб берди.
Унинг сўзларига кўра, Uzbekistan GTL синтетик суюқ ёқилғи ишлаб чиқарувчи завод ишга тушганидан сўнг мамлакатда авиакеросин ва дизел ёқилғиси ишлаб чиқарила бошланади, бу эса ушбу турдаги маҳсулотлар импортини амалга оширмаслик имконини беради.
«Натижада биз авиакеросин ва дизель ишлаб чиқариш учун импорт қилинаётган нефтни бензин ишлаб чиқариш учун сарфлашимиз мумкин. Бу албатта бензин таннархи ва нефть маҳсулотлари нархи тушишига олиб келади», — дейди у.
***
Ўзбекистонда 2019 йилнинг 1 январь куни айрим турдаги енгил автомобилларни божхона божига тортиш бўйича янги тартиб ишлаб чиқилмоқда.
1 январдан Ўзбекистонда 40 минг АҚШ доллар ва ундан юқори бўлган эквивалент қийматидаги автомобилларги тааллуқли бўлган янги тартиб жорий этилмоқда. Бу янги автотранспорт воситалари бўлиши лозим. «Янги» деганда божхона расмийлаштирувидан ўтказилаётган вақтда ишлаб чиқарилганига икки йилдан ошмаган автомобиллар тушунилади. Улар учун пасайтирилган божхона тўлови қўлланилади.
Ушбу автомобилларга импорт божи қўлланилмайди, фақат 20 фоиз аксиз солиғи ҳамда 20 фоиз қўшимча қиймат солиғи тўланиши лозим. Божхона тўловларининг умумий ставкаси олиб кирилаётган автомобилнинг 44 фоизини ташкил қилади.
***
Ўзбекистон Республикаси Марказий банки хорижий сўмга нисбатан янги қийматларини эълон қилди.
Унга кўра 1 АҚШ доллари 12,95 сўмга қимматлашиб, 8325, 59 сўмни ташкил этди.
Евро курси эса, аксинча 42,72 сўмга арзонлашиб, 9413,74 сўмни ташкил этди.
***
«Коинот гўзали» халқаро гўзаллик танловида филиппинлик қиз ғолиб бўлди. Халқаро танловнинг финал босқичи Бангкокда бўлиб ўтди.
Унда дунёнинг энг гўзал қизи номига Филиппин вакили Катриона Grey сазовор бўлди.
Иккинчи ўринни Венесуэла вакили Стефани Гутеррес эгаллади.
***
Фавқулодда вазиятлар вазирлиги Сейсмопрогностик мониторинг Республика маркази бошлиғининг биринчи ўринбосари Сайдулло Набиев 14 декабрь куни чамаси соат 10.00 ларда Наманган шаҳрида портлашга ўхшаган қаттиқ гумбурлаш овози эшитилгани ҳолати юзасидан изоҳ берди:
— Намангандаги ҳолат юзасидан марказимиз, қолаверса, шахсан ўзим суриштирув ишлари олиб бордим. Шуни айтиш керакки, 14 декабрь куни соат 10.00 ларда ва ундан кейин ҳам идорамизга ер қимирлаши, яъни зилзила содир бўлганлигини билдирувчи ҳеч қандай сигнал келиб тушмаган. Ушбу масала юзасидан ФВВ Наманган вилояти бошқармаси бошлиғи билан ҳам боғландим. Маълум бўлишича, ўша куни бошқармага ҳеч бир киши гумбурлаш ҳолатидан жабрлангани ёки жиддий зиён кўрганлиги ҳақида шикоят ёки ариза келиб тушмаган. Қолаверса, вазиятга ойдинлик киритиш мақсадида Ўзгидрометрология маркази билан боғландим. Уларга кўра, гумбурлаш ҳолати кузатилгач Наманган вилояти осмонида об-ҳаво ўзгариши ёки шунга ўхшаш ҳолат содир бўлмаган.
Изоҳ (0)