International Hotel Tashkent меҳмонхонасида SOLA бренди остида янги телекоммуникацион Wi-Fi операторини ишга тушириш расмий маросими бўлиб ўтди. Бу ҳақда SOLA Wi-Fi оператори пресс-релизида айтилади.
Тошкент интернетга кенг полосали симсиз уланиш умумшаҳар тармоғи бўлган Марказий Осиёдаги биринчи шаҳарга айланади. Ҳозирги пайтда пойтахтда 1200 та Wi-Fi нуқталари фаолият кўрсатмоқда, келгуси йилнинг баҳоригача эса уларнинг сонини 5000 гача етказиш режалаштирилган.
SOLA тизими тармоққа уланишнинг иккита кўринишини таклиф этади — пуллик ва бепул. Бепул кириш реклама ролигини кўриб чиқишдан кейин тақдим этилади. Пуллик тарифлар трафик бўйича чекловларсиз ишлайди ва қулайлиги билан ажралиб туради: абонентга соатлик, кунлик, ҳафталик ёки ойлик обуна таклиф этилади.
«SOLA тармоғи Тошкентнинг Жанубий ва Шимолий вокзаллари, Megaplanet, Parus, Samarqand Darvoza ва Vega Centre кўнгилочар савдо марказлари, ‘Чилонзор’, ‘Қатортол’, ‘Юнусобод’, ‘Миробод’ ва ‘Паркент’ бозорлари каби оммабоп жойларни аллақачон қамраб олган. Уланишга келиб тушаётган талабномаларга мувофиқ қамров доираси доимий равишда кенгайиб боради. Бизнинг яқин режаларимизда — Ўзбекистоннинг сайёҳлик шаҳарларида Wi-Fi тармоғини ўрнатишдир», — деди Asia Wireless Group МЧЖ директори Бекзод Аҳмедов.
Asia Wireless Group компаниясининг келгуси режаларида Тошкентда Wi-Fi шаҳар тармоғини кенгайтириш ва Жиззах, Самарқанд, Фарғона, Андижон, Наманган, Бухоро, Навоий, Урганч ва Қаршида 45 мингдан ортиқ кириш нуқталарини ўрнатиш белгиланган.
Изоҳ (0)