17-dekabrning asosiy yangiliklari — “Daryo” dayjestida.
“O‘zbekneftgaz” boshqaruv raisi Bahrom Ashrafxonov nimalar hisobiga mamlakatda benzin narxi tushishi va uning tanqisligi bartaraf etilishi haqida so‘zlab berdi.
Uning so‘zlariga ko‘ra, Uzbekistan GTL sintetik suyuq yoqilg‘i ishlab chiqaruvchi zavod ishga tushganidan so‘ng mamlakatda aviakerosin va dizel yoqilg‘isi ishlab chiqarila boshlanadi, bu esa ushbu turdagi mahsulotlar importini amalga oshirmaslik imkonini beradi.
“Natijada biz aviakerosin va dizel ishlab chiqarish uchun import qilinayotgan neftni benzin ishlab chiqarish uchun sarflashimiz mumkin. Bu albatta benzin tannarxi va neft mahsulotlari narxi tushishiga olib keladi”, — deydi u.
***
O‘zbekistonda 2019-yilning 1-yanvar kuni ayrim turdagi yengil avtomobillarni bojxona bojiga tortish bo‘yicha yangi tartib ishlab chiqilmoqda.
1-yanvardan O‘zbekistonda 40 ming AQSh dollar va undan yuqori bo‘lgan ekvivalent qiymatidagi avtomobillargi taalluqli bo‘lgan yangi tartib joriy etilmoqda. Bu yangi avtotransport vositalari bo‘lishi lozim. “Yangi” deganda bojxona rasmiylashtiruvidan o‘tkazilayotgan vaqtda ishlab chiqarilganiga ikki yildan oshmagan avtomobillar tushuniladi. Ular uchun pasaytirilgan bojxona to‘lovi qo‘llaniladi.
Ushbu avtomobillarga import boji qo‘llanilmaydi, faqat 20 foiz aksiz solig‘i hamda 20 foiz qo‘shimcha qiymat solig‘i to‘lanishi lozim. Bojxona to‘lovlarining umumiy stavkasi olib kirilayotgan avtomobilning 44 foizini tashkil qiladi.
***
O‘zbekiston Respublikasi Markaziy banki xorijiy so‘mga nisbatan yangi qiymatlarini e’lon qildi.
Unga ko‘ra 1 AQSh dollari 12,95 so‘mga qimmatlashib, 8325, 59 so‘mni tashkil etdi.
Yevro kursi esa, aksincha 42,72 so‘mga arzonlashib, 9413,74 so‘mni tashkil etdi.
***
“Koinot go‘zali” xalqaro go‘zallik tanlovida filippinlik qiz g‘olib bo‘ldi. Xalqaro tanlovning final bosqichi Bangkokda bo‘lib o‘tdi.
Unda dunyoning eng go‘zal qizi nomiga Filippin vakili Katriona Grey sazovor bo‘ldi.
Ikkinchi o‘rinni Venesuela vakili Stefani Guterres egalladi.
***
Favqulodda vaziyatlar vazirligi Seysmoprognostik monitoring Respublika markazi boshlig‘ining birinchi o‘rinbosari Saydullo Nabiyev 14-dekabr kuni chamasi soat 10.00 larda Namangan shahrida portlashga o‘xshagan qattiq gumburlash ovozi eshitilgani holati yuzasidan izoh berdi:
— Namangandagi holat yuzasidan markazimiz, qolaversa, shaxsan o‘zim surishtiruv ishlari olib bordim. Shuni aytish kerakki, 14-dekabr kuni soat 10.00 larda va undan keyin ham idoramizga yer qimirlashi, ya’ni zilzila sodir bo‘lganligini bildiruvchi hech qanday signal kelib tushmagan. Ushbu masala yuzasidan FVV Namangan viloyati boshqarmasi boshlig‘i bilan ham bog‘landim. Ma’lum bo‘lishicha, o‘sha kuni boshqarmaga hech bir kishi gumburlash holatidan jabrlangani yoki jiddiy ziyon ko‘rganligi haqida shikoyat yoki ariza kelib tushmagan. Qolaversa, vaziyatga oydinlik kiritish maqsadida O‘zgidrometrologiya markazi bilan bog‘landim. Ularga ko‘ra, gumburlash holati kuzatilgach Namangan viloyati osmonida ob-havo o‘zgarishi yoki shunga o‘xshash holat sodir bo‘lmagan.
Izoh (0)