Ўзбекистонда пиротехника воситаларининг ноқонуний савдоси билан боғлиқ 4 та ҳолат бўйича жиноят иши қўзғатилиб, 110 ҳолатда ҳуқуқбузарлар маъмурий жавобгарликка тортилди. Бу ҳақда ИИВ жамоатчилик ва ОАВ билан алоқалар бошқармаси бошлиғи Қутбиддин Бурҳонов маълум қилди, дея хабар беради ЎзА.
Тошкент шаҳрида ўтказилган тезкор профилактик тадбир пайтида фуқаролар Д.А., Т.Ж. ҳамда А.Р. 17 дона жами 2 миллион 850 минг сўмлик пиротехника воситаларини ноқонуний сақлаб келаётганликлари аниқланиб, тегишли тартибда олиб қўйилган. Ушбу ҳолат юзасидан уларга Жиноят кодексининг 2501-моддаси билан жиноят иши қўзғатилган. Суднинг ҳукми билан айбдорларнинг ҳар бирига энг кам иш ҳақининг 15 фоизини давлат фойдасига ушлаб қолиш шарти билан икки йил муддатга ахлоқ тузатиш ишлари жазоси тайинланди.
Жиззах шаҳрида яшовчи Р.А.нинг ёнидан 1 қути пиротехника буюмлари олинди. Ушбу ҳолат юзасидан расмийлаштирилган ҳужжатлар Жиззах шаҳар маъмурий судига тақдим этилди. Суд томонидан Р.А.га нисбатан энг кам ойлик иш ҳақининг икки баравари миқдорида жарима жазоси қўлланилди.
Бухоро вилоятининг Ғиждувон тумани, Кўшк қишлоғида яшовчи М.А. ўз уйида яширинча пиротехника буюмларини сотаётганлиги тўғрисидаги маълумотга асосан ўтказилган тадбирда 300 та блокда жами 3000 қути, яъни 15 миллион сўмлик пиротехника буюмлари борлиги аниқлаб, тегишли тартибда расмийлаштирилди.
Тошкент вилоятининг Келес шаҳридаги 10-сонли умумтаълим мактаби 7-синф ўқувчиси мактабда пиротехника воситалари сотаётгани ички ишлар органлари ходимлари томонидан аниқланган. Унинг сумкаси кўздан кечирилганида 60 дона пиротехника воситаси топилган.
Изоҳ (0)