Мамлакатдан қочишга уринган Дубай амирининг қизи ҳикояси тафсилотлари маълум бўлди. Бу ҳақда «Би-би-си» нинг «Дубайдан қочиш» деб номланган ҳужжатли фильмида ҳикоя қилинади.
32 ёшли Латифа бин Муҳаммад ал-Мактум — Бирлашган Араб Амирликларининг вице-президенти Муҳаммад ибн Рашид ал-Мактумнинг қизи . У 16 ёшида ҳам қочишга уринган, бироқ чегарада қўлга тушган. Шундан сўнг у уч йил қамоқхонада ўтирган, у ерда қийноққа солинган.
Малика бу сафарги қочишга жуда эҳтиёткорлик билан тайёргарлик кўрган. У 2011 йилда Франция ҳарбий разведкаси собиқ агенти Эрве Жобер ҳақида интернетда ўқиган. Собиқ агент 2008 йилда ҳукумат билан келишмовчиликдан сўнг БААдан қочишга мажбур бўлган. Латифа электрон почта орқали у билан боғланиб, ундан маслаҳат сўраган. Улар мунтазам ёзишиб турган ва қочиш логистикасини муҳокама қилган.
2014 йилда Латифа финляндиялик капоэйри мураббийи Тина Яухияйнен билан танишади. У маликанинг мураббийи ва яқин дугонасига айланади. У қочишни тайёрлашга ёрдам берган ва бир неча марта Жобер билан учрашиш учун парвоз қилган.
2018 йилнинг мартида Латифа эрта тонгда уйғониб, дугонаси Яухияйнен билан учрашади. Учрашувдан сўнг кийимини ўзгартириб, қора кўзойнак тақади. Иккаласи машинада қўшни Уммонга жўнайди. У ерда дам солинадиган қайиқ ва гидроциклга чиқиб, очиқ денгизда бир неча соат сузади. Соҳилдан 40 километр масофада уларни яхтада Жобер кутган.
Яхта бир неча кун Ҳиндистоннинг Гоа штатида сузган. Ҳиндистон соҳилларига 50 километрга яқин масофа қолганда кема бортига қуролланган одамлар чиқиб, шайхнинг қизини олиб кетган. Шундан кейинги воқеалар номаълумлигича қолмоқда. Латифа қўлга тушгандан сўнг дўстлари билан мулоқот қилмаган, унинг Instagram’даги аккаунти ўчирилган.
Эслатиб ўтамиз, аввалроқ Латифа бин Муҳаммад ал-Мактум мамлакатдан қочишга бесамар уринишларидан сўнг, дом-дараксиз йўқолиб қолганлиги ҳақида хабар берилган эди.
Изоҳ (0)