Тожикистонлик меҳнат муҳожирлари Россияда яшаш муддатини узайтириш учун ҳар уч ойда мамлакат чегарасини кесиб ўтиши керак. Улар кўпинча Украина ёки Қозоғистонга чиқиб келади, деб ёзмоқда TJournal.
Тожикистонлик муҳожир Зуҳриддин Ғиёсов бир неча кун аввал Россия—Қозоғистон чегарасини кесиб ўтиш чоғида россиялик чегарачилар томонидан тўхтатилган. Чегарачилар ундан ва унинг шеригидан соқолларини олиб ташлашни талаб қилган.
Муҳожирнинг айтишича, назорат постига 300 километр қолганда, такси ҳайдовчиси улардан ихтиёрий сартарошхонага кириб, соқолларини олдиришни сўраган ва бу аҳволда чегарачилар уларни ўтказмаслигини айтган. Бироқ муҳожирлар ҳайдовчининг гапига қулоқ солмасдан, йўлда давом этишни сўраган.
Улар Россиянинг Оренбург вилояти ва Қозоғистон ўртасидаги Маштаково чегара постига келганда, чегарачилар улардан соқолларини олиб ташлашни талаб қилган. Муҳожирлар соқолларини олиб ташлагандан кейингина чегарани кесиб ўтишга рухсат берилган.
Мазкур чегара постидан кўп сонли тожикистонлик меҳнат муҳожирлари ўтади ва чегарачилар уларнинг шахсини ишончли равишда тасдиқлаш учун улардан соқолларини олиб ташлашни сўрайди.
Ғиёсовнинг айтишича, чегарачилар бунинг бирор бир янги қоида ёки топшириқ эканлигини айтмаган, шунчаки соқолни олиб ташлашни сўраган.
Изоҳ (0)