Бугун,

  • USD 10940.05
  • RUB 182.26
  • EUR 11121.65

Олий Мажлис Қонунчилик палатасининг 24 октябрь куни бўлиб ўтган ялпи мажлисда «Менинг фикрим» портали орқали келиб тушган «Туманлар ва шаҳарлар кўчаларида вақт ўтишини тескари ҳисобловчи светофорлар ўрнатиш мақсадга мувофиқлиги тўғрисида»ги электрон жамоавий мурожаатни кўриб чиқиш натижалари тўғрисидаги масала кўриб чиқилди.

Фото: «Газета.uz»

Фото: «Газета.uz»

Депутат Расул Кушербаевнинг маълум қилишича, 10 мингдан зиёд овоз тўплаган ушбу петицияда Қорақалпоғистон, вилоятлар ва Тошкент шаҳрида ўрнатилган амалдаги транспорт ва пиёдалар светофорларини вақт ўтишини тескари ҳисобловчи индикаторлар билан жиҳозланган транспорт ва пиёдалар светофорларига босқичма-босқич алмаштириш ҳақидаги таклиф баён этилган.

Маълумотда йўл ҳаракатини ташкил этишнинг техник воситаларини қўллашга ва светофорларга оид амалдаги давлат стандартлари 1986 ва 1991 йилларда қабул қилинган бўлиб, бугунги кунда йўл ҳаракатини тартибга солинишини тўлиқ таъминлай олмаётганлиги билдирилди.

Шундан келиб чиқиб, Олий Мажлиснинг Қонунчилик палатаси Вазирлар Маҳкамасига уч ой муддатда серқатнов чорраҳалардаги транспорт ва пиёдалар светофорларини вақт ўтишини тескари ҳисобловчи индикаторлар билан жиҳозланган транспорт ва пиёдалар светофорларига босқичма-босқич алмаштириш бўйича тегишли идоралар ва ҳокимликлар билан чора-тадбирлар режаси ишлаб чиқиш ва амалга ошириш, янгиланган «Йўл ҳаракатини ташкил этишнинг техник воситалари», «Светофорлар» стандартларини илғор хорижий ва халқаро тажрибани инобатга олиб ишлаб чиқиб тасдиқлаши кераклиги бўйича тавсиялар берилган қарор қабул қилган.

Маълумот учун, Ўзбекистоннинг бир қатор шаҳарларида таймерли светофорлардан бир неча йилдан бери, тўлиқ бўлмаса-да, қисман фойдаланиб келинади. 2017 йил апрелида Тошкентнинг Нурафшон айланма кўчасидаги чорраҳаларнинг бирига синов тариқасида таймерли светофор ўрнатилган эди. 2018 йил майида эса пойтахт ҳокими Жаҳонгир Ортиқхўжаев ташаббуси билан пиёдалар светофорлар таймерли вариантларига алмаштириш бошлангани эълон қилинган эди.

Изоҳ
Асосий янгиликлар