Oliy Majlis Qonunchilik palatasining 24-oktabr kuni bo‘lib o‘tgan yalpi majlisda “Mening fikrim” portali orqali kelib tushgan “Tumanlar va shaharlar ko‘chalarida vaqt o‘tishini teskari hisoblovchi svetoforlar o‘rnatish maqsadga muvofiqligi to‘g‘risida”gi elektron jamoaviy murojaatni ko‘rib chiqish natijalari to‘g‘risidagi masala ko‘rib chiqildi.
Deputat Rasul Kusherbayevning ma’lum qilishicha, 10 mingdan ziyod ovoz to‘plagan ushbu petitsiyada Qoraqalpog‘iston, viloyatlar va Toshkent shahrida o‘rnatilgan amaldagi transport va piyodalar svetoforlarini vaqt o‘tishini teskari hisoblovchi indikatorlar bilan jihozlangan transport va piyodalar svetoforlariga bosqichma-bosqich almashtirish haqidagi taklif bayon etilgan.
Ma’lumotda yo‘l harakatini tashkil etishning texnik vositalarini qo‘llashga va svetoforlarga oid amaldagi davlat standartlari 1986 va 1991-yillarda qabul qilingan bo‘lib, bugungi kunda yo‘l harakatini tartibga solinishini to‘liq ta’minlay olmayotganligi bildirildi.
Shundan kelib chiqib, Oliy Majlisning Qonunchilik palatasi Vazirlar Mahkamasiga uch oy muddatda serqatnov chorrahalardagi transport va piyodalar svetoforlarini vaqt o‘tishini teskari hisoblovchi indikatorlar bilan jihozlangan transport va piyodalar svetoforlariga bosqichma-bosqich almashtirish bo‘yicha tegishli idoralar va hokimliklar bilan chora-tadbirlar rejasi ishlab chiqish va amalga oshirish, yangilangan “Yo‘l harakatini tashkil etishning texnik vositalari”, “Svetoforlar” standartlarini ilg‘or xorijiy va xalqaro tajribani inobatga olib ishlab chiqib tasdiqlashi kerakligi bo‘yicha tavsiyalar berilgan qaror qabul qilgan.
Ma’lumot uchun, O‘zbekistonning bir qator shaharlarida taymerli svetoforlardan bir necha yildan beri, to‘liq bo‘lmasa-da, qisman foydalanib kelinadi. 2017-yil aprelida Toshkentning Nurafshon aylanma ko‘chasidagi chorrahalarning biriga sinov tariqasida taymerli svetofor o‘rnatilgan edi. 2018-yil mayida esa poytaxt hokimi Jahongir Ortiqxo‘jayev tashabbusi bilan piyodalar svetoforlar taymerli variantlariga almashtirish boshlangani e’lon qilingan edi.
Izoh (0)