Қорақалпоғистонда беш кишининг ўлимига сабаб бўлган ЙТҲда айбдор деб топилган шахс 10 йилгача озодликдан маҳрум этилиши мумкин

22 октябрь куни тонг соат 7:00 да Қорақалпоғистон ҳудудидан ўтган «Ғузор—Бухоро—Нукус—Бейнеу» А-380 йўлининг 680—681-километр оралиғида Нукус шаҳри томонга қараб ҳаракатланиб келаётган, фуқаро Ш.К.бошкарувидаги Cobalt русумли транспорт воситаси билан шу йўлда Беруний тумани томонга қараб ҳаракатланиб келаётган фуқаро Ж.А. бошқарувидаги Nexia русумли автомашина билан тўқнашгани ҳақида аввал хабар берилган эди.

Ушбу йўл-транспорт ҳодисаси оқибатида 5 киши турли даражада тан жароҳатлари олиб, вафот этган эди.

Қорақалпоғистон ИИВ матбуот хизматидан «Дарё»га маълум қилишларича, ушбу ҳодиса юзасидан Қорақалпоғистон ИИВ ҳузуридаги Тергов бошқармаси томонидан Ўзбекистон Жиноят кодексининг 266-моддаси 3-қисми «а» банди билан («одамлар ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш») жиноят иши қўзғатилган ва ҳозирда тергов ҳаракатлари олиб борилмоқда.

Маълумот учун, ушбу модда бўйича айбдор деб топилган шахслар муайян ҳуқуқдан маҳрум қилиб, 10 йилгача озодликдан маҳрум қилиш билан жазоланади.