Самарқандда ноқонуний тарзда пахта ёғи ишлаб чиқараётган фуқаролар аниқланди

Самарқанд вилояти Ички ишлар бошқармаси Жиноят қидирув бўлими Коррупция ва иқтисодий жиноятларга қарши курашиш бўлими ходимлари томонидан чигитдан олинадиган маҳсулотни қонунга хилоф равишда ишлаб чиқариш билан шуғулланиб келаётган бир қатор жиноий гуруҳларнинг фаолиятига чек қўйилди.

«Дарё» мухбири Фарҳод Норбўтаевнинг маълум қилишича, жорий йилнинг 10 октябрь куни ўтказилган тезкор тадбир давомида 1990 йилда Оқдарё тумани Янгиқурғон қишлоғида яшовчи фуқаро О.С. ўзи яшаб келаётган уйнинг ёрдамчи хўжалигида ноқонуний равишда «жувоз» ташкил қилиб, пахта хом ашёси чигитидан қўл бола ускуналарда ўсимлик ёғи ишлаб чиқараётганлиги аниқланган. Воқеа жойидан 200 килограмм кунжара, 100 килограмм чигит ва 20 килограмм пахта ёғи далилий ашё сифатида олиб қўйилган.

2018 йилнинг 9 октябрь куни Самарқанд вилояти Нарпай тумани ИИБ ходимлари томонидан ўтказилган тезкор тадбир давомида 1976 йилда туғилган, Нарпай тумани Кўкота қишлоғида яшовчи фуқаро С.Ш. ва 1987 йилда туғилган, Кўкота қишлоғида яшовчи фуқаро Н.Ж. ўзаро келишган ҳолда С.Ш. яшаб келаётган уйнинг ёрдамчи хўжалигида ноқонуний равишда ташкил қилган «жувоз» орқали пахта хом ашёси чигитдан қўл бола ускуналарда ўсимлик ёғи ишлаб чиқараётганлиги аниқланган. Воқеа жойидан бир дона тўлиқ тўплам жувоз қурилмаси, 650 килограмм кунжара, 400 килограмм чигит ва 130 литр тозаланмаган пахта ёғи далилий ашё сифатида олиб қўйилган.

Дастлабки тергов суриштирув жараёнида С.Ш. пахта хом ашёсини «Мели» исмли фермер хўжалиги раисидан олганлигини маълум қилган. Олиб борилган тезкор суриштирув ишлари мобайнида «Мели» исимли шахс 1963 йилда туғилган, «Санжар Хақбердиев» фермер хўжалиги раиси, Нарпай тумани «Арабхона» маҳалласида яшовчи Ю.Х. эканлиги маълум бўлди. Ю.Х. ҳақиқатдан ҳам С.Ш.га 2 200 кг пахта хом ашёсини ҳар бир килограммини 3 800 сўмдан, жаъми 8 360 000 сўмга сотганлиги аниқланган.

Ҳолат юзасидан С.Ш. ва Н.Ж.га нисбатан Ўзбекистон Республикаси Жиноят Кодексининг 186-моддаси 2-қисми билан жиноят иши қўзғатилиб, эҳтиёт чораси сифатида қамоқ қўлланилган.

Шунингдек, 1975 йилда туғилган, Каттақўрғон тумани «Қушбеги» маҳалласида яшовчи Қ.Ж. ўзи яшаб келаётган уйнинг ёрдамчи хўжалигида ноқонуний равишда ташкил қилган «жувоз» орқали чигитдан қўл бола ускуналарда ўсимлик ёғи ишлаб чиқараётганлиги аниқланган. Воқеа жойидан 500 килограмм кунжара, 10 килограмм пахта чигити ва 10 килограмм пахта хом ашёси далилий ашё сифатида олиб қўйилган.