Ўзбекистон Республикаси Президентининг «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида» 2018 йил 20 апрелдаги ПФ-5421-сон Фармони асосида фуқаролар томонидан ўзбошимчалик билан эгаллаб олинган ер участкалари ёки рухсатнома олмай қурилган турар жойларга нисбатан мулк ҳуқуқини олиш давлат хизматлари марказлари ва кўчмас мулкка нисбатан ҳуқуқни эътироф этиш туман (шаҳар) комиссиялари томонидан амалга оширилади.
Афсуски, Самарқанд вилоятида мазкур йўналиш бўйича айнан комиссия аъзолари мукаммал ва сифатли фаолият кўрсатмаяпти. Айримларида ҳатто ўзаро ҳужжат алмашинуви йўлга қўйилмаган. Оқибатда мурожаатлар жавобсиз қолиб, ижро интизоми бузилмоқда. Бу эса фуқароларнинг қабул қилинган фармон ва қарорларга нисбатан ишончсизлигига олиб келмоқда, дейди «Дарё» мухбири Фарҳод Норбўтаев.
Мазкур акция эълон қилинидан буён бугунги кунга қадар Самарқанд вилояти туман (шаҳар) Давлат хизматлари марказларига жами 4224 та мурожаат келиб тушган. Шулардан бор йўғи 511 тасига мулк ҳуқуқини эътироф этиш бўйича туман (шаҳар) ҳокимлари томонидан қарор чиқарилган. Жумладан, Самарқанд шаҳрида 79 та, Оқдарё туманида 172 та, Пастдарғом туманида 10 та, Пахтачи туманида 22 та, Ургут туманида 30 та, Иштихон туманида 28 та, Нарпай туманида 5 та, Жомбой туманида 33 та, Нуробод туманида 38 та, Каттақўрғон шаҳрида 25 та, Қўшработ туманида 25 та, Тайлоқ туманида 1 та, Самарқанд туманида 12 та, Каттақўрғон туманида 3 та, Паяриқ туманида 5 та ва Булунғур туманида 23 та мурожаат ижобий ҳал қилинган.
Мурожаатларнинг 585 таси рад этилган бўлиб, аксарият мурожаатларнинг ижро муддатлари бузилган. Бу эса ушбу жараённиг энг оғриқли нуқтаси ҳисобланади.
«Ўтказилган ўрганишлар ҳамда «Кадастр 2.0» тизимидан олинган маълумотлар таҳлили шуни кўрсатмоқдаки, умумдавлат акцияси доирасида ташкил этилган комиссия ишчи органига комиссия аъзолари томонидан кўчмас мулк объекти бўйича ўз хулосаларини белгиланган муддат мобайнида тақдим қилмай, қатор қонун бузилиши ҳолатларига йўл қўйиб келинмоқда. Жумладан, Самарқанд шаҳар давлат солиқ инспекцияси 727 та, Ургут туман ДСИ 76 та, Каттақўрғон туман ДСИ 36 та, Оқдарё туман ДСИ 35та, Нарпай туман ДСИ 9 та, Пахтачи туман ДСИ 25 та, Каттақўрғон шаҳар ДСИ 15 та, Тайлоқ туман ДСИ7 та ҳолатда қонун бузилишига йўл қўйган», — дейди Давлат хизматлари агентлиги Самарқанд вилоят бошқармаси ходими А.Пиримов.
Умумдавлат акцияси доирасида қатор қонун бузилиши ҳолатларига, мурожатларнинг ижро муддатини бузилишига йўл қўйишлик, ўзларига юклатилган вазифаларни тўлиқ ижро этмаслик, асоссиз равишда мурожаатларни кўриб чиқиш муддатларига риоя этмаслик ҳолатлари вилоят Ички ишлар бошқармасининг туман ва шаҳар бўлимлари ҳам борлиги масаланинг нечоғлик оғриқли эканлигидан далолатдир.
Хусусан, биргина Самарқанд шаҳар ИИБ 116 та, Каттақўрғон шаҳар ИИБ 62 та, вилоят ИИБ Ёнғин хавфсизлиги бошқармаси 33 та, Паяриқ туман ИИБ Ёнғин хавфсизлиги бошқармаси 64 та, Ургут уман ИИБ 84 та ва туман ИИБ ЁХБ 64 та, Каттақўрғон туман ИИБ 33 та, Пастдарғом туман ИИБ ЁХБ 12 та, Оқдарё туман ИИБ 61 та, Тайлоқ туман ИИБ 30 та ва туман ИИБ ЁХБ 3 та, Нарпай туман ИИБ 42 та, Пахтачи туман ИИБ 72 та мурожаатга эътиборсиз қараб келган.
Шунингдек, Самарқанд шаҳар Архитектура бошқармаси 235 та, Каттақўрғон шаҳар архитектура бошқармаси 24 та, Паяриқ туман Архитектура бошқармаси 43 та, Каттақўрғон туман ДСЭНМ 23 та, Ургут туман ДСЭНМ 51 та, Нарпай туман ДСЭНМ 60 та, Паяриқ туман ДСЭНМ 64 та, Пастдарғом туман ДСЭНМ 19 та Пахтачи туман ДСЭНМ 30 та, Ургут туман Экология ва атроф мухитни мухофаза қилиш инспекцияси 78 та, Паяриқ туман Экология ва атроф мухитни мухофаза қилиш инспекцияси 82 та, Оқдарё туман Экология ва атроф мухитни мухофаза қилиш инспекцияси 35 та ҳолат қайд этилган.
«Бугунги кунда қонун бузилиш ҳолатларига йўл қўйган 15 нафар комиссия аъзолари ва уларнинг масъул ходимлари маъмурий жавобгарликка тортилган. Бу борадаги ишлар бошқарма томонидан мунтазам равишда амалга оширилиб борилмоқда. Бироқ, шуни алоҳида таъкидлаш жоизки, токи қуйи тизимдаги масъул идоралар қабул қилинаётган норматив-ҳуқуқий ҳужжатларнинг мазмун-моҳиятини тўлиқ англаб ижросини сифатли қилиб таъминламас экан бу ҳужжатлар шунчаки қоғозда қолиб кетаверади», — дейди Давлат хизматлари агентлиги Самарқанд вилоят бошқармаси ходими А.Пиримов.
Изоҳ (0)