«Тошшаҳартрансхизмат» компанияси раҳбарияти автосаройлар таркибидаги энг кўп масофа босиб ўтган 2008−2009 йилларда ишлаб чиқарилган Mercedes-Benz Low Floor русумли автобусларни 13 октябрдан бошлаб йўловчи ташиш учун йўналишларга чиқармаслик бўйича қарор қабул қилди. Бу ҳақда компания ахборот хизматига таяниб, «Газета.uz» хабар қилди.
Мазкур қарор компания раҳбари Моҳиржон Валиев томонидан сўнгги кунларда пойтахтда йўловчи автобусларида тез-тез ёнғинлар содир бўлаётгани сабабли қабул қилинди.
Бугун, 12 октябрь куни соат 14:50 атрофида Тошкент шаҳрининг Паркент бозорига яқин ҳудудда 95-йўналишдаги автобус ёниб кетди.
Шу билан бир қаторда, барча эски автобуслар бўйича махсус — кучайтирилган тартибда техник кўрик ўтказилади. Унда транспортдаги барча техник жисмларнинг яроқлилик даражаси аниқланади. Бу бўйича комиссия хулосаси олинади. Шунга мувофиқ эски автобусларни йўналишларга чиқариш ёки чиқармаслик бўйича якуний қарор қабул қилинади.
«Тошшаҳартрансхизмат» раҳбарияти йўналишлардаги автобуслар қатновида юзага келадиган оралиқ вақтларнинг узайиши ва бошқа ноқулайликлар учун барча йўловчилардан узр сўраб, ушбу ноқулайликларни тезда баратарф этиш чоралари кўрилишини маълум қилди.
10 октябрь куни соат 14:52 да «Чинни бозор – Қорақамиш» йўналиши бўйлаб ҳаракат қилаётган Mercedes-Benz Low Floor русумидаги 87-рақамли автобусда ёнғин чиққан эди.
Изоҳ (0)