Бухоро шаҳридаги Абу Али ибн Сино кўчасида жойлашган савдо дўконлари эгаларидан келиб тушган шикоятда солиқ идораси ходимлари пахта теримига чиқмаган ёки ўзининг ўрнига ҳашарчи ёлламаган дўкондорларга таҳдид қилгани айтилади. «Turon 24» мухбири мазкур ҳолат юзасидан Бухоро вилоят давлат солиқ бошқармаси матбуот хизмати билан ҳамкорликда суриштирув ўтказди.
Савдо дўконлари эгалари мурожаатда келтирилган важларни тасдиқлаб, қуйидагиларни маълум қилди:
— Ўзини солиқ идорасиданман деб таништирган киши, аввалига, дўкон ҳужжатлари ўрнидами-йўқлигини сўради, — дейди якка тартибдаги тадбиркор Замира Турдиева. — Текшириб кўрган бўлди. Кейин муддаога ўтди. Айтишича, пахтага чиқишимиз ёки ўрнимизга ҳашарчи ёллашимиз керак экан. Ҳашарчи текинга ишламаса... Мен шундай дея пахта теримига одам чиқаролмаслигимни айтдим. Куни кеча савдо дўконим ҳужжатлари юзасидан Бухоро шаҳар солиқ инспекциясига борганимда: «Ҳашарга икки-учта одамингни келтир, кейин ишингни ҳал қилиб берамиз» дейишди.
Солиқчилар «С-маркет» дўкони эгаси Мирҳидоят Шароповни ҳам пахтага чиқишга ундаган. Бироқ Замира Турдиевадан фарқли ўлароқ унга пахта теримига чиқиш мажбурий эмаслигини ҳам тушунтиришган.
— Мен дўкондор сифатида пахтага чиқишга ҳам, чиқмасликка ҳам ҳақим бор, — дейди Мирҳидоят Шаропов. — Иш берувчи ёки қайсидир давлат органларининг ҳам пахта масаласи бўйича бировни ишдан бўшатишга, унга нисбатан чора кўришга ҳақи йўқ. Бу ҳақда оммавий ахборот воситалари орқали ҳар куни тушунтириш берилмоқда, ҳуқуқимиз бузилса мурожаат қилишимиз сўралмоқда. Бундан хабаримиз бор.
«Turon 24» мухбири йигирмадан ортиқ тадбиркор билан суҳбатлашиб, Бухоро шаҳар давлат солиқ инспекцияси ходимлари уларни пахта йиғим-теримига тарғиб этишда қонун билан белгиланган ваколатларидан четга чиққан-чиқмаганини суриштирди.
Бухоро шаҳар давлат солиқ инспекцияси бошлиғи биринчи ўринбосари Фурқат Бобомуродов инспекция ходимлари томонидан тадбиркорларни теримга мажбурлаш ҳолатлари содир этилгани ҳақидаги шикоятга муносабатини билдирди:
«Бухоро шаҳрида ўн мингдан ортиқ хўжалик субъекти фаолият юритади. Инспекция томонидан уларнинг ҳеч бирини мажбурий тартибда пахта теримига жалб этишга йўл қўйилмайди. Тўғри, баъзи ходимларимиз билан шундай ҳолат юз берган бўлиши мумкин. Бу бизга қоронғи. Яна бир томони, айрим тадбиркорлар солиқ хизмати тарғибот-ташвиқотларини нотўғри талқин қилиб ёки тушунмай, мажбурий меҳнатга жалб қилиш, деб баҳолаяптилар. Ҳар бир фуқаро ёки тадбиркор ўз ҳақ-ҳуқуқини билган ҳолда белгиланган тартиб асосида фаолият юритиши чекланмаган».
Суриштирув давомида Бухоро шаҳри аҳолиси ва тадбиркорларни пахта теримига ихтиёрий равишда жалб этиш мақсадида Бухоро шаҳар давлат солиқ инспекцияси томонидан тарғибот-ташвиқот ишлари йўлга қўйилгани тасдиғини топди. Бироқ амалдаги қонун ҳужжатларида белгиланган нормаларга зид равишда пахта теримига чиқмаган ёки ўрнига ҳашарчи чиқармаган тадбиркорларга таҳдид қилган солиқчиларнинг кимлигини аниқлашнинг иложи бўлмади.
Изоҳ (0)