Фарғона вилоятидаги теримчиларга кўмаклашиш мақсадида вилоят давлат солиқ бошқармаси ҳамда Фарғона шаҳар давлат солиқ инспекциясининг 200 дан ортиқ ходими шанба ва якшанба кунлари Тошлоқ тумани «Навбаҳор Ф сервис» муқобил МТП ҳудудида жойлашган «Навбаҳор саховати» фермер хўжалигидаги пахта теримида иштирок этди. Бу ҳақда Фарғона вилояти давлат солиқ бошқармаси Жамоатчилик билан алоқалар ва ҳуқуқий ахборот шўъбаси хабар берди.
— Юртимиз бойлиги бўлган «оқ олтин»ни совуқ кунларга қолмай ўз вақтида териб олишга барчамиз бирдек масъулмиз, – дейди вилоят давлат солиқ бошқармаси бўлим бошлиғи Дилмурод Бакубаев. – Дам олиш кунлари бошқарманинг барча ходимлари вилоятимиздаги пахта-йиғим теримида фаол иштирок этдилар. Фикримча, биз бу билан фермерларимизга бироз бўлса-да, ёрдам кўрсатамиз, шу билан бирга, бундай ўзига хос «ҳашар»лар меҳнат жамоамизнинг янада бирлашувига хизмат қилади.
— Бу йил фермер хўжалигимиздаги пахта майдони 29 гектар бўлиб, ҳар бир гектардан 33 центнер, жами 100 тонна пахта олишни режалаштирганмиз, — дейди «Навбаҳор саховати» фермер хўжалиги раҳбари Қодирали Йўлдошев. – Ушбу мавсумдаги йиғим-теримда асосан фермер хўжалиги аъзолари, қўшни маҳаллалардан ҳамда турли ташкилотлардан, хусусан, солиқ идораларидан кўнгиллилар иштирок этмоқда. Айтиш жоиз, мавсум давомида теримчиларга барча зарур шароитлар яратиб берилмоқда ҳамда ҳар бир килограмм терилган пахта учун давлат томонидан белгиланган сумма ўз вақтида тўланмоқда.
Шу ўринда эслатиб ўтиш жоиз, пахта теримида ихтиёрий тарзда қатнашиш истагини билдирган фуқароларнинг ҳуқуқ ва манфаатлари давлат томонидан ҳимоя қилинади ҳамда улар учун пахта мавсумида барча зарур шароитлар яратиб берилади.
Изоҳ (0)