Қозоғистон Ўзбекистонга хом ашёларни, асосан, тирик кўринишда экспорт қилмоқда. Масалан, яқинда Қарағанди буқалари биринчи марта Ўзбекистонга экспортга жўнатилди, деб ёзади Spot Қозоғистоннинг «Хабар» агентлигига таяниб.
Қозоғистон компаниялари тирик қорамолни жўнатади, Ўзбекистон гўшт комбинатлари эса иш ўринлари яратишдан ташқари, боғлиқ бўлган бошқа маҳсулотлар — тери, суяк уни ва ичак-човоқлар ҳисобидан қўшимча даромад ҳам олади, дейилади хабарда.
«Уларда ишлов бериш баралла ишлайди. Нима учун ўзимиз тайёр маҳсулотлар ишлаб чиқаришни йўлга қўя олмаймиз?» — деган саволни қўяди агентлик журналистлари.
Бунга жавобан, KazakhExport компанияси департаменти директори Аян Бектибаева тирик қорамол талабгирроқ эканлигини, қайта ишланган маҳсулотни юбориш учун эса глобал инвестициялар ва катта ҳажмдаги айланма капитал керак бўлишини айтди.
«Хабар» журналистлари таъкидлашича, шунга ўхшаш вазият ун тортиш соҳасида ҳам кузатилмоқда.
«Донни сотамиз, унни эса йўқ, чунки Ўзбекистон унни олиб кириш учун божни кўтаради, донга божни эса пасайтиради. Экспортдаги бундай ўйинлар нима билан боғлиқ? Ва биз ўз манфаатларимизни қандай ҳимоя қиламиз?» — деб сўради журналистлар.
Бектибаева ҳар бир мамлакат ўз манфаатларини қўллаб-қувватлашини, Қозоғистон ҳам шунчаки хом ашё эмас, тайёр маҳсулотни экспорт қилишга уринаётганини, бунинг учун компанияларга дотациялар тақдим этилганини айтди.
Изоҳ (0)