25—26 сентябрь кунлари Аҳмад Фарғоний номидаги Фарғона вилоят ахборот-кутубхона марказида «Соғлом ва маънавий етук авлод – юрт келажаги!» шиори остида «Болалар китоби» анъанавий фестивали ва китоблар кўргазмаси ўтказилди. Унда 1000 нафардан зиёд ёш китобхонлар иштирок этди. Бу ҳақда «Дарё» мухбири Азизжон Эрматов хабар берди.
Фестиваль Фарғона вилояти ҳокимлиги, Матбуот ва ахборот бошқармаси, Ёзувчилар уюшмаси, Ёшлар иттифоқи, Халқ таълими ва Ўрта махсус касб-ҳунар таълими бошқармалари ҳамкорлигида ташкил этилди.
Фестивальда вилоятдаги ахборот-кутубхона марказлари, кутубхоналар, босмахоналар ва болалар нашриётлари фаолияти кичик китобсеварларга кўргазмали чиқишлар орқали таништирилди.
Таниқли шоир ва ёзувчилар билан адабий учрашувлар, янги нашр этилган бадиий ва маънавий-маърифий китоблар тақдимоти, викторина ва танловлар ўтказилди. «Баркамол авлод» марказлари ўқувчиларининг эртаклар асосида чизган расмлари кўргазмаси, «Мен севган китоб» мавзусида ижтимоий сўровнома ва чегирмали китоб савдоси ташкил этилди.
– Айни пайтда вилоятда 1 200 га яқин кутубхона ва ахборот-ресурс маркази, 40 дан ортиқ китоб дўкони китобхонларга сифатли хизмат кўрсатмоқда. Ахборот-кутубхона муассасаларининг китоб фонди 6273 минг нусхани ташкил этиб, шундан 158 мингтаси электрон ресурслардир, – дейди вилоят Матбуот ва ахборот бошқармаси бошлиғи Умиджон Жабборов.
Фестиваль якунида вилоят ахборот-ресурс маркази ҳамда халқ таълими бошқармаси мутахассислари томонидан «Мен ўқиган энг яхши китоб» блиц-иншо танлови ўтказилиб, ғолиблар тақдирланди.
Изоҳ (0)