Индонезиялик серфарзанд оиланинг Ўзбекистон ҳақида ёзган китоби машҳур бўлиб кетди
Зиёрат туризмини тарғиб этувчи индеонезиялик серфарзанд оиланинг «Ўзбекистон – меҳмондўст давлат» номли юз минг нусхада нашр этилган китоби Индонезияда машҳур бўлиб кетди, деб ёзади «Турон24». Китоб Халилинтар фамилияли оиланинг аъзолари томонидан ёзилган, яъни бир неча муаллиф қаламига мансуб.
Самарқанд шаҳрига 2014 йилда саёҳат қилиб, ўзбек халқининг маданияти ҳақида катта таассуротга эга бўлган оила китоб чиқаришга қарор қилган. Китобнинг ўзбек тилидаги нусхаси Самарқанд шаҳрида нашр этилиши режаланган.
Оилани «King of YouTube» («YouTube қироли») деб аташади. Бу уларнинг YouTube’даги саҳифаси 15 миллиондан ортиқ обуначига эгалиги билан изоҳланади. Оила вакиллари томонидан Ўзбекистон ҳақида суратга олинган роликни YouTube’да ҳозирга қадар 150 мингдан ортиқ киши томоша қилган.
Халилинтар оиласи Самарқанд шаҳрида сайёҳликни ривожлантириш учун сармоя киритишни режаламоқда.
