Хоразм, Сурхондарё ва Наманган вилоятларида 12 та синов судларида суд мажлисларини online.oliysud.uz сайтида онлайн-трансляция қилиш йўлга қўйилди. Бу ҳақда Олий суд расмий вакили Азиз Обидов маълум қилди, деб ёзади «Газета.uz».
Йил якунига қадар яна 22 судни, 2019 йил давомида эса 100 дан ортиқ судни тизимга қўшиш режалаштирилмоқда.
«Бу чора одил судлов очиқлиги ва шаффофлигининг мутлақо янги даражасига эришиш, шунингдек, судлар ишида сифат ва самарадорликни оширишга қаратилган», — дея таъкидлайди Азиз Обидов.
Видеоёзувлар архивда сақланади, уларни суд иш рақами бўйича топиш мумкин. Шахсий ҳаёт дахлсизлигини ҳимоя қилиш учун суд мажлислари томонлар розилиги билан трансляция қилинади.
Бундан ташқари, 25 сентябрдан Ўзбекистон Олий судининг sud.uz, oliysud.uz ва supcourt.uz манзилларида фаолият олиб борувчи янги интерактив имкониятлари тақдимоти ҳам ўтказилди.
E-SUD тизими орқали нафақат судга ҳужжатларни электрон шаклда юбориш, балки ишнинг кўриб чиқиш босқичларини кузатиб бориш ва суд қарорларининг электрон нусхаларини олиш ҳам мумкин.
Сайтга ўзбек, рус ва қорақалпоқ тилларида фуқаролик ишлари бўйича судларга мурожаат қилишга оид 500 га яқин намуна жойлаштирилди.
Шунингдек, Олий суд расмий интернет манбасида шахсий ҳаёт дахлсизлигини ҳимоя қилиш учун томонлар розилиги билан суд қарорлари эълон қилиниши мумкин.
Изоҳ (0)