Қозоғистон Ўзбекистон билан ҳамкорликда сунъий йўлдош яратишни режалаштирмоқда. Бу ҳақда Қозоғистон мудофаа ва аэрокоинот саноати вазирлиги халқаро ҳарбий-техник ҳамкорлик департаменти директори Асланбек Сирланов маълум қилди, дея хабар беради «Казинформ».
Бу қурилма нафақат Қозоғистон ёки Ўзбекистонга, балки минтақанинг бошқа давлатларига ҳам хизмат қилиши мумкинлиги билдирилмоқда.
«Ҳозир ўзбекистонлик ҳамкасбларимиз хорижий сунъий йўлдошлардан фойдаланмоқда. Шу сабабли ҳамкорликда битта шундай қурилма қуриш таклифи тушди», — деди Сирланов.
Шунингдек, Марказий Осиё давлатлари ҳамкорлиги доирасида бирйўла 5 та сунъий йўлдош қуриш ғояси ҳам муҳокама қилинмоқда. Шунда минтақанинг ҳар бир давлати биттадан қурилмани бошқариши, қолаверса, ҳар бир қурилмадаги маълумотлардан фойдаланиши мумкин бўлади.
Изоҳ (0)