2018 йил 4 август кунидан шу кунга қадар Сирдарё вилояти йўлларига ўрнатилган онлайн тартибда ишловчи фоторадарларда жами 17 571 та қоидабузарлик ҳолати аниқланган. Бу ҳақда вилоят ИИБ «Дарё»га маълум қилди.
Сирдарё вилояти ҳудудида йўл-транспорт ҳодисаларининг келиб чиқишига асосий омил бўлаётган тезликни ошириш ҳолатларини аниқлаш самарадорлигини яънада ошириш мақсадида, Сирдарё тумани ҳудудидан ўтувчи халқаро аҳамиятдаги М-34 автомобиль йўлининг 91-километр масофасига ҳамда Оқолтин тумани ҳудудидан ўтувчи А-373 автомобиль йўлининг 3-километр масофасига ўрнатилган онлайн тартибида ишловчи фоторадарларда 2018 йил 4 август кунидан шу кунга қадар жами 17 571 та қоидабузарлик ҳолати аниқланган бўлиб, умумий ҳисобда қоидабузар ҳайдовчиларга нисбатан 6 104 411 900 сўм жарима солинган.
Сирдарё вилояти ИИБ ЙҲХБ томонидан олиб борилган тарғибот-ташвиқот ишлари натижасида таҳлилларга кўра, вилоят ҳудудида жорий 2018 йилнинг август ойи якунига кўра содир этилган йўл-транспорт ҳодисалари ўтган 2017 йилга нисбатан 35 тага камайган бўлса, содир этилган ушбу ҳодисалар оқибатида оғир тан жароҳати олган фуқаролар 25 тага, ҳалок бўлганлар 10 тага камайишига эришилди.
Жами 131 та (2017 йилда 166 та) йўл-транспорт ҳодисаси содир этилган. Содир этилган ушбу ҳодисалар оқибатида 98 нафар (2017 йилда 123 нафар) фуқаролар оғир тан жароҳати олган бўлса, 33 нафари (2017 йилда 43 нафари) ҳалок бўлган.
Эслатиб ўтамиз, Сирдарё вилоятидаги йўл-транспорт ҳодисалари энг кўп содир бўладиган икки ҳудудга онлайн режимда ишлайдиган иккита фоторадар комплекси ўрнатилган эди.
Изоҳ (0)