Жиззахда бўлиб ўтган Халқаро сармоявий форумда маҳаллий ҳокимият ва Туризмни ривожлантириш қўмитаси томонидан тайёрланган лойиҳалар ҳам намойиш этилди. Бу ҳақда Sputnik хабар берди.
Тақдим этилган лойиҳалар ҳудудда туризмни уч асосий йўналиш —экологик туризм, агротуризм ва этник туризм йўналишларида ривожлантиришни назарда тутган.
Бахмал ва Зомин туманлари ҳудудларида ушбу лойиҳаларни амалга оширишда керак бўладиган инфратузилмаларни барпо этиш учун ер майдонлари ажратишга қарор қилинди.
Жумладан, 2 минг гектар ер майдони экотуризмни ривожлантириш учун ажратилади. Лойиҳа доирасида ушбу ҳудудда экологик сўқмоқлар ташкил қилиш, от, эшак ва квадротциклда сайр қилиш, фуникулерлар қуриш, тоғ чанғиси мажмуаси, ресторан ҳамда ахборот маркази, музей ва маҳаллий ҳунармандчилик маҳсулотлари сотиш дўконлари барпо этиш режалаштирилган.
5 минг гектар ер агротуризм учун ажратилади. Ушбу майдонда дам олиш уйлари, спорт мажмуалари, камёб ҳайвонот ва ўсимлик турларини сақлаш учун питомниклар қурилади. Шунингдек, молхоналар ҳамда асал етиштириш хўжаликлари ташкил этилади. Бу ерда сайёҳлар туяларда сайр қилиш, кўпкари ўйинини томоша қилиш, мева териш, ўт ўриш каби қишлоқ хўжалик ишларида иштирок этишлари мумкин бўлади.
Изоҳ (0)