Мудофаа вазирлиги спорт мажмуасида Ўзбекистон Республикаси мустақиллигининг 27 йиллигига бағишлаб, ҳарбий хизматчилар ва уларнинг оила аъзолари учун спорт мусобақаси, концерт дастури ва байрам сайли ўтказилди. Бу ҳақда вазирлик матбуот хизмати «Дарё»га маълум қилди.
Тантанали тадбир иштирокчилари спортнинг шахмат-шашка, арқон тортиш, стол тенниси, мини футбол, волейбол, бадминтон каби турлари бўйича беллашувларнинг гувоҳи бўлишди. Мусобақа ғолибларига эсдалик совғалари ва фахрий ёрлиқлар топширилди.
Шунингдек, болалар учун кўнгилочар ўйинлар, саҳна қўринишлари ва томошалар, вазирлик марказий аппаратининг таркибий бўлинмалари ўртасида миллий таомларни тайёрлаш бўйича танлов, қурол-аслаҳа кўргазмаси ҳамда озиқ-овқат ярмаркаси ташкил этилди.
Қуролли Кучлар академияси курсантлари томонидан қўл жанги санъати элементлари билан чиқишлар, Мудофаа вазирлиги марказий ҳарбий оркестри жамоаси ҳамда Қуролли Кучлар марказий ашула ва рақс ансамбли хонандалари, ўзбек эстрадасининг ёрқин юлдузлари томонидан ижро этилган куй-қўшиқлар барчага кўтаринки кайфият бағишлади.
Байрам тадбирида «АрМИ-2018» IV Халқаро армия ўйинларида «Содиқ дўст» танловининг 300 метрли тўсиқлар йўлагидан ўтишда Ўзбекистон Мудофаа вазирлиги Марказий хизмат итлари питомниги ҳарбий хизматчиси Шокир Жўраевининг 1 дақиқаю 15 сония натижа билан рекорд ўрнатган «Гита» лақабли хизмат ити ҳам маҳоратини намойиш этди.
Шунингдек, байрамга бағишлаб Тошкентнинг «Абдулла Қодирий», «Анҳор Локомотив» ва «Ашҳобод» истироҳат боғларида ҳамда «Халқлар дўстлиги» майдонида Қуролли Кучлар марказий ашула ва рақс ансамбли, Мудофаа вазирлиги марказий ҳарбий оркестри, Қуролли Кучлар академияси ва Тошкент ҳарбий округи ҳарбий оркестрлари томонидан концерт дастурлари ҳамда ҳарбий хизматчиларнинг кўргазмали чиқишлари бўлиб ўтди.
Бу каби тадбирлар Тошкент, Марказий, Шарқий, Шимоли-ғарбий, Жануби-ғарбий махсус ҳарбий округларида ҳам кенг кўламда ўтказилмоқда.
Изоҳ (0)