Қашқадарёда футбол ўйинларига тикилган пулларни қабул қилиб, махфий тотализатор ташкил қилган шахс ушланди (видео)

Ўзбекистон Бош прокуратураси ҳузуридаги департамент ходимлари Қашқадарё вилоятида махфий тотализатор ташкил қилган шахсни қўлга олди, деб ёзади «Podrobno.uz».

Фуқаро А. футбол ўйинларига тикилган пулларни қабул қилиб, махфий тотализатор ташкил қилган. Эркак ўзига ғолиблар ютуғининг 10 фоизини олиб қолган. Шу билан бирга, у ёшларни бу ноқонуний ўйин бизнесига фаоллик билан жалб қилган.

Ёшлардан бири тотализаторда пул тикишга жиддий берилиб кетган. Охир-оқибат, А. алдов йўли билан унинг 12 минг доллар пулини ютиб олган. Шундан кейин йигит яна пул тикишда давом этиб, 9,6 минг доллар ютган, бироқ А. унга бу пулни беришдан бош тортган, устига-устак ундан таҳдид ва товламачилик йўли билан пул талаб қилган.

Прокуратура ходимлари олиб борган тезкор тадбирлар чоғида жиноятчи йигитдан 1,5 минг доллар олаётган вақтда жиноят устида қўлга олинди.

Ушбу ҳолат бўйича жиноят иши қўзғатилди.