Бугун,

  • USD 11095.31
  • RUB 173.84
  • EUR 10772.44

«Дарё» таҳририятига Самарқанд вилояти Ургут тумани Бахрин маҳалласида яшовчи фуқаро Феруз Фармонов қўнғироқ қилиб, Ургут туман Ички ишлар органи фаолиятини мувофиқлаштириш бўлими Қоратепа милиция таянч пункти ходимлари томонидан 4 ойдан буён унинг йўқолган қора молларини топиш бўйича берган аризаси ўрганилмаётганлиги тўғрисида мурожаат қилди.

Фото: «Дарё»

Фото: «Дарё»

— «Жорий йилнинг 9 май куни қишлоғимиздан 35 бош қорамол йўқолди. Дастлаб моллар бирор ерга кетиб қолган бўлиши мумкин дея ўзимиз қидирдик. Аммо топа олмадик. Сўнг Қоратепа милиция таянч пунктига моллар йўқолгани ҳақида ариза билан мурожаат қилдик. Бу орада ўзимиз ҳам қидирувга киришдик. Қидирув натижасида иккита қорамолни Қашқадарё вилояти Чироқчи туманидаги Чоршанба бозоридан топдик», — дейди Феруз Фармонов. – «Рўзимурод исмли фуқаро молларни Самарқанд вилояти Булунғур туманидаги бозордан Асқар Маллаев деган шахсдан 2.700.000 сўмга олганлигини билдириб ўтди. Биз Қашқадарё вилояти ИИБ ходимлари билан қашқадарёлик одамни Булунғур туманига олиб бориб, ўша фуқаро билан юзлаштирдик. Молни ҳақиқатда у олганлиги аниқ бўлди. Аммо негадир Қоратепа милиция таянч пункти раҳбари Алишер Раимбердиев ва тезкор қидирув бўлими бошлиғи Отамурод (фамилияси ноаниқ) акалар ушбу ҳолат юзасидан жиноят иши очишни пайсалга соляпти.

Фото: «Дарё»

Фото: «Дарё»

Фото: «Дарё»

Фото: «Дарё»

Мазкур ҳолат бўйича Самарқанд вилоят ички ишлар бошқармасига мурожаат қилдик. ИИБ матбуот хизмати раҳбари Ширин Нормуродованинг маълум қилишича, айни пайтда Ургут туманида йўқолган қорамоллар бўйича жиноят иши очилган бўлиб, ушбу жиноят иши вилоят ИИБ раҳбарининг назоратида эканлигини билдириб ўтди.

«Дарё» мухбири Фарҳод Норбўтаев қора моллари йўқолган Бахрин қишлоғида яшовчи 18 нафар фуқаролар билан ҳам суҳбатлашишди. Фуқароларнинг таъкидлашича, Қоратепа милиция таянч пункти ходимлари аниқ гумонланган шахсларни сўроқ қилиш ўрнига, умуман бошқа одамларни сўроқ қилаётган экан.

«4 ойдан буён аризамизни ўрганишни орқага ташлаяпти. Молни ўғирланишида гумонланган шахсларни топдик. Уларни Ички ишларга олиб келдик. Аммо негадир ИИБ ходимлари гумонланиб ушланган шахсларни сўроқ қилгиси келмаяпти», — дейди Мўмин Омонов. «Вилоятдан келган терговчилар ҳам 4 кун одамларни чақириб сўроқ қилишди. Тўрт кундан сўнг йўқолиб қолишди. Ёзмаган жойимиз қолмади. Бироқ, ҳеч қандай натижа бўлгани йўқ.

Фото: «Дарё»

Фото: «Дарё»

Фуқароларнинг таъкидлашича, улар мазкур иш бўйича бир неча бор вилоят ИИБга мурожаат қилган бўлишларига қарамасдан вазият ўзгармаган. Уларнинг жорий йилнинг 10 июль куни Ички ишлар вазирлигига ёзган мурожаати Ургут туман ИИО ФМБ ҳузуридаги тергов бўлимига келиб тушган бўлиб, ҳолат бўйича Жиноят Кодексининг 169-моддаси 2-қисми «б» банди билан жиноят иши қўзғатилганлиги тўғриси 13 июль куни жавоб хати юборилган.

Бахрин маҳалла фуқаролар йиғини раиси Шерзод Маллаевнинг таъкидлашича, қишлоқда 7 нафар чўпон бўлиб, улар ҳар мавсумда қишлоқ одамларининг молларини тоғли ҳудудга чиқариб боқишар экан.

«Тўрт ойдан буён ушбу иш билан юрибмиз. Ҳеч бир натижа йўқ. Чироқчи туманидаги Чоршанба бозорида Рўзимурод исмли шахс молни булунғурлик Асқар Маллаевдан олганлигини билдирган. Аммо ички ишлар бу масалани очиқ қолдириб, бошқа шахсларни сўроқ қилиб ётибди», — дейди Шерзод Маллаев.

Ҳозирги кунда 33 та қорамолнинг қаерга кетганлиги номаълумлигича қолмоқда. Моллари йўқолган фуқаролар ушбу ҳолат бўйича Қоратепа милиция таянч пункти раҳбари ва тезкор қидирув бўлим бошлиғи томонидан ҳеч қандай чора кўрилмаётганлиги сабабдан бу ўғирликка уларнинг ҳам шерикчилиги бор деган гумонда. Шу сабабли ҳам ички ишлар ходимларининг бундай ҳатта-ҳаракати юзасидан Ички ишлар вазири билан учрашиш ниятида.

— «Биз 18 киши бўлиб вилоят ИИБ раҳбарининг қабулига кирмоқчи бўлдик. Асл ҳолатни тушунтириб, ички ишлар ходимлари томонидан жиноят иши яширилаётганлигини билдирмоқчи эдик. Аммо бизни қабулга киритмади», — дейди Рафиқ Фармонов. – «Қоратепа милиция таянч пункти раҳбарлари бизни уришиб ташлади. Керак бўлса ўзинг топасан, молни мен йўқотганим йўқ, деган гаплар билан бизнинг мурожатимизга бепарво қараб келяпти.

Ушбу ҳолатни ўрганиш жараёнида бизга маълум бўлишича, Бахрин қишлоғида йўқолган 33 та қорамолни ўғирлашда ушбу қишлоқда яшовчи фуқаро ҳам кўмаклашган. Ички ишлар ходимларига гумонланувчи 3 нафар шахснинг номи аниқ. Аммо негадир Қоратепа милиция таянч пункти ходимлари уларни сўроқ қилиш ўрнига, бошқа шахсларни саволга тутмоқда.

Қизиқ, Ургут туман ички ишлар ходимларининг бундай иш тутишига сабаб нима? Нега улар аниқ гумонланувчилар бўлатуриб бошқа шахсларни тергов қилмоқда. Нега жиноятни тез тугатиш ўрнига уни ортга сурмоқда?

Изоҳ
Асосий янгиликлар
Маҳаллий
Ҳуқуқ фаоли Нукус воқеаларида гумонланаётганлар қийноққа солинмаганини айтмоқда
Дунё
«Дарё» кундалигида 30 ноябрда содир бўлган энг муҳим воқеалар
Маҳаллий
Контрабанда сигареталар кўпроқ қайси вилоятлар чегараларидан олиб ўтилмоқда? Божхоначи жавоб берди