Жиззах олий ҳарбий авиация билим юрти, Жиззах вилояти ҳалқ таълими бўлими ҳамда Ўзбекистон ёшлар иттифоқи Жиззах вилояти кенгаши билан ҳамкорликда Жиззах шаҳридаги касб-ҳунар коллежи ўқувчи ёшлари, умумий ўрта таълим мактаб ўқувчилари ва мактабгача таълим тарбияланувчилари иштирокида «Ватан муқаддас, уни ҳимоя қилиш шарафли бурчдир!» шиори остида кўргазмали тадбир ўтказилди. Бу ҳақда Мудофаа вазирлиги матбуот хизмати «Дарё»га маълум қилди.
Тадбирда 800 нафардан ортиқ ўқувчи ёшлар иштирок этди. Иштирокчилар ҳарбий самолёт ва вертолётларнинг тактик ва техник тавсифлари ҳамда авиация қурол-аслаҳалари билан таништирилди. Тадбирнинг кулминациясига ЯК-52 ҳарбий самолётларининиг жанговар парвоз-шоулари айланди.
Шундан сўнг тадбирнинг бадиий қисми бошланиб, унда ҳарбий оркестр шахсий такриби ва 29-сон Меҳрибонлик уйи тарбияланувчилари ўзларининг чиқишлари билан тадбирга ўзгача кайфият бағишлади.
Тадбирдан кўзланган асосий мақсад аввало миллий армиянинг куч ва имкониятлари билан ёшларни таништириш ва уларни ватанпарварлик руҳида тарбиялаш, ҳарбий техникаларнинг тактик ва техник тавсифлари ҳамда авиация қурол-аслаҳалари билан таништиришдан иборат.
Изоҳ (0)