ЎзА: Ўзбекистонда блокчейнни мактаб дастурига киритиш зарур

ЎзА Миллий ахборот агентлиги мақоласида блокчейнни мактаб дастурига киритиш зарурлиги айтилади, деб ёзади Spot.

Таъкидланишича, блокчейн соҳасини ҳозирданоқ мактаб фанларига киритиб бориш лозим, университетларда ўқитиб, ҳаётга татбиқ қилиш керак. Шу билан бирга, халқада криптовалюта биржалари билан ишлаш маданияти шакллантирилиши лозим.

«Криптовалюта биржаларини тақиқлаш, тўсиқ қўйиш ёки сунъий йўллар билан чегаралаш блокчейн соҳасининг ривожига таъсир қилади. Бундай камчиликларнинг олдини олиш учун Давлат ўзининг криптовалюта фондини шакллантириб, халқ билан биргаликда инвестиция қилиш ва уни бошқаришни йўлга қўйиши лозим. Ўзбекистон фуқаролари ва ёшлари ҳам криптовалюталарга инвестиция қилиш ва уларни бошқариш билимини, маданиятини ошириб, глобал блокчейн оламида ўз ўрнини эгаллашига имкон мавжуд», — дейилади мақолада.

Қайд этилишича, блокчейн ва майнинг ёрдамида яхшигина пул ишлаб олиш мумкин, бунга мисол сифатида steemit, golos.io, d.tube блокчейн тармоқлари келтириб ўтилган.

««Блокчейн», «Майнинг», «Айрдроп», «Баунти» ва шу каби янги сўзлар, тушунчалар эндиликда ҳаётимизга жуда тезлик билан кириб келади», — дейилади мақолада.

Шунингдек, Ўзбекистон биринчилардан бўлиб Марказий Осиё мамлакатлари орасида Блокчейн технологиясини қонунийлаштираётгани эслатиб ўтилади.