«Менга оёқ кийим олиб берган қўшниларимнинг тўйида текин хизмат қиляпман». «Миллион» жамоасининг собиқ вакили Шаҳло Зоирова оғир ўтган болалиги ҳақида (видео)

«Миллион» жамоасининг собиқ, «Миллий Арт» кулгу жамоасининг аъзоси Шаҳло Зоирова «Дарё» интернет-нашри учун эксклюзив интервью берди. Интервьюни журналист Феруз Муҳаммад уюштирди.

Интервью давомида Шаҳло Зоирова қийинчиликларга тўла болалиги ҳақида гапириб берди.

Болалигимда оёқ кийимга пулим етмаган, иқтисодий жиҳатдан қийналган вақтларимизда қўшниларимиз оёқ кийим олиб берарди. Қўшниларим «Ол, Шаҳло, бу сенга, кийиб юравер» дер эди. Онам кўз ёш қилиб, «Сизга бунинг пулини қандай қайтариб берамиз» деганларида, қўшниларимиз «Олаверинг, бу сизга, қизингизга», деб ҳаттоки пулини ҳам сўрамас эди. Ҳозир энди шунақа вазият бўлдики, улғайганимдан сўнг уларнинг тўйларида бир сўм пул олмасдан, беминнат хизмат қиламан. «Менга пулингиз керак эмас, ўшанда бизга жуда кўп яхшилик қилгансиз, кўксимиздан итармагансиз», дея уларнинг қайсики яхши куни бўлса холажон, тоғажон дея хизматларида бўламан. Бу ҳаётда ҳеч нарса бесабаб бўлмас экан. Ўтган кунларимга беҳисоб шукрлар қиламан.

Шаҳло Зоирова, «Миллий Арт» жамоаси аъзоси