«Ўзбекконцерт» бадиий кенгаши Зиёданинг «Мазза-мазза» қўшиғига ишланган клипни эфирга узатишни рад этди

«Ўзбекконцерт» давлат муассасаси қошидаги қўшиқлар ва уларга ишланган видеоклиплар савиясини баҳолаш бадиий кенгашининг навбатдаги йиғилиши бўлиб ўтди. Кенгашда 8 нафар хонанда томонидан тақдим этилган видеоклиплар кўриб чиқилди.

Ўзбекистон халқ артисти Гулсанам Мамазоитова ижро этган «Сенсиз» қўшиғига ишланган видеоклипни эфирга узатишга тавсия берилди.

«Мароқанд» гуруҳи ижро этган «Маликам», «Ниҳол» мукофоти совриндори Шахризода Аҳмедова (Каниза) ижро этган «Навбат сизга етди», «Ниҳол» мукофоти совриндори Бунёдбек Саидов ижро этган «Маржона», Хонанда Муҳайё Умарова ижро этган «Майда майда» деб номланган қўшиқларга ишланган видеоклипларда кадрлардаги жузъий камчиликлар санъаткорларга тушунтирилиб, шартли равишда рухсат берилди.

Ўзбекистонда хизмат кўрсатган артист Зиёда Қобулованинг «Мазза-мазза» қўшиғига ишланган видеоклипда маънавиятга зид ҳатти-ҳаракатлар мавжудлиги, шунингдек, қўшиқ матни мазмунан саёзлиги ва бадиий жиҳатдан жўнлиги боис бир овоздан рад этилди.

Хонанда Баҳром Каримов ижро этган «Келин қидириб» қўшиғига видео ҳаваскорлик даражасида ишлангани ҳамда қўшиқ билан клип ўртасида боғлиқлик йўқлиги учун рад этилди.

Улуғбек Холиқов ижро этган «Гавана» қўшиқ матни шеърият талабларига мутлақо жавоб бермаслиги, олди-қочди гаплардан иборатлиги, унга ишланган видеоклипдаги тасвирларда менталитетга зид ҳолатлар тасвири мавжудлиги боис бир овоздан эфирга узатиш рад этилди.