Тожикистон ташқи ишлар вазирлиги беш ёшли қизчанинг қотилига қатъий жазо белгиланишини сўраб, Россия ташқи ишлар вазирлигига хат йўллади. Бу ҳақда Sputnik хабар бермоқда.
«22 июль куни Серпухов шаҳрида беш ёшли Тожикистон фуқароси Ҳувайдо Тиллозоданинг шафқатсизларча ўлдирилиши қалбларни ларзага келтирди. Болага нисбатан бундай ҳайвонларча содир этилган жиноятни диққат билан ўрганиб чиқишингизни сўраймиз ва айбдорни қатъий жазолашингизни талаб қиламиз», — дейилади хабарда.
Тожикистоннинг Россиядаги элчихонаси вазиятни назоратга олган ва қизчанинг ота-онаси билан мунтазам алоқада.
Элчихона қизчанинг жасадини Тожикистонга юборишга ҳам ёрдам берган.
23 июль куни Серпухов шаҳрида бир кун аввал болалар майдончасида йўқолиб қолган Ҳувайдо Тиллозоданинг жасади топилган эди.
Қизчани излашга нафақат полициячилар, балки кўнгиллилар ҳам бош қўшди. Улар қизчанинг жасади солинган сумкани темир йўл рельси яқинидан топган.Ҳозирда қизчани ўлдирганликда гумон қилинаётган шахс қўлга олинган. У ўлдирилган қизчанинг оиласи билан бир уйда яшаган 28 ёшли фуқаро бўлиб чиқди.
Ҳозирда ҳолат юзасидан текширув ишлари олиб борилмоқда.
Изоҳ (0)