Tojikiston tashqi ishlar vazirligi besh yoshli qizchaning qotiliga qat’iy jazo belgilanishini so‘rab, Rossiya tashqi ishlar vazirligiga xat yo‘lladi. Bu haqda Sputnik xabar bermoqda.
“22-iyul kuni Serpuxov shahrida besh yoshli Tojikiston fuqarosi Huvaydo Tillozodaning shafqatsizlarcha o‘ldirilishi qalblarni larzaga keltirdi. Bolaga nisbatan bunday hayvonlarcha sodir etilgan jinoyatni diqqat bilan o‘rganib chiqishingizni so‘raymiz va aybdorni qat’iy jazolashingizni talab qilamiz”, — deyiladi xabarda.
Tojikistonning Rossiyadagi elchixonasi vaziyatni nazoratga olgan va qizchaning ota-onasi bilan muntazam aloqada.
Elchixona qizchaning jasadini Tojikistonga yuborishga ham yordam bergan.
23-iyul kuni Serpuxov shahrida bir kun avval bolalar maydonchasida yo‘qolib qolgan Huvaydo Tillozodaning jasadi topilgan edi.
Qizchani izlashga nafaqat politsiyachilar, balki ko‘ngillilar ham bosh qo‘shdi. Ular qizchaning jasadi solingan sumkani temir yo‘l relsi yaqinidan topgan.Hozirda qizchani o‘ldirganlikda gumon qilinayotgan shaxs qo‘lga olingan. U o‘ldirilgan qizchaning oilasi bilan bir uyda yashagan 28 yoshli fuqaro bo‘lib chiqdi.
Hozirda holat yuzasidan tekshiruv ishlari olib borilmoqda.
Izoh (0)