Тошкент шаҳрининг Шайхонтоҳур тумани, Ўрда канали яқинидаги 2 туп чинор дарахтининг ердан 4-5 метр баландликдаги қисми қолдирилиб, кесиб ташланди. Бу ҳақда ЎзА хабар бермоқда.
Суриштирув натижасида ҳеч қандай рухсатномасиз, ноқонуний тарзда амалга оширилган ушбу ҳаракатга мутасадди ташкилотларнинг масъуллари томонидан йўл қўйилгани маълум бўлди. Уларга нисбатан 46,1 миллион сўм миқдорида жарима белгиланди.
Тошкент шаҳар ҳокимлигида бир қатор ташкилотлар ҳамкорлигида «Пойтахтимизда қарийб бир аср яшаётган ва ундан ҳам зиёд умр кўраётган дарахтларни асраб-авайлаш ва уларнинг кесилишига қарши курашиш» мавзуида ўтказилган матбуот анжуманида шу ҳақда сўз борди.
Жорий йилнинг 6 ойи давомида Экология ва атроф-муҳитни муҳофаза қилиш давлат қўмитаси ҳузуридаги Биохилма-хиллик ва муҳофаза этиладиган табиий ҳудудларни муҳофаза қилиш ва улардан фойдаланишни назорат қилиш инспекцияси Тошкент шаҳар бўлинмасига Тошкент ва Сирдарё вилоятидан 4400 тупдан зиёд дарахт кесилишига оид 607 мурожаат бўлган. Шу мурожаатларнинг 404 таси рухсатнома асосида кесилаётгани маълум қилинган. 203 мурожаат эса ноқонуний ҳолда амалга оширилаётгани боис керакли чоралар кўрилган.
Ушбу муддат давомида пойтахтда ҳам соҳага оид ҳуқуқбузарликларни тезкор аниқлаш, тегишли чоралар кўриш юзасидан рейдлар ўтказилди. Жараёнда ноқонуний равишда дарахт кесишга йўл қўйилган ҳолатлар аниқланиб, қонунни бузган шахсларга нисбатан 95 ҳолатда 17 миллион сўмдан ортиқ жарима солинди. Айни вақтгача 10,1 миллион сўм миқдордаги жарима ундирилган.
Бундан ташқари, 86 ҳолатда 930 миллион сўмдан зиёд ўсимлик дунёсига етказилган зарар аниқланган ва 37 ҳолат бўйича 27,6 миллион сўм миқдордаги жарима ундирилган. Табиатга етказган зарари учун 4 фуқарога нисбатан 361,5 миллион сўм жарима белгиланди.
Экология ва атроф-муҳитни муҳофаза қилиш давлат қўмитаси ва Тошкент шаҳар ҳокимлиги ўртасида қўшма қарор тузилди. Унда белгиланишича, жорий йилнинг 1 сентябридан бошлаб 1 туп кесилган дарахт учун 10 туп манзарали кўчат экиш белгиланди. Дарахтларни кесишда аввал битта ташкилот мутахассиси ўрганиб, хулоса чиқарган бўлса, эндиликда бу жараёнга мутасадди ташкилот ходими, маҳалла ва ҳудуддаги ТСЖ ходимлари ҳам жалб этилади.
Изоҳ (0)