Корея Ихтирочи аёллар ассоциацияси (KWIA), Корея интеллектуал мулк офиcи (KIPO) ва Халқаро интеллектуал мулк ташкилоти (WIPO) томонидан жорий йилнинг 28 июнь — 3 июль кунлари Жанубий Кореяда 11-Халқаро ихтирочи аёллар кўргазмаси — KIWIE 2018 бўлиб ўтди. Бу ҳақда «Дарё»га Ўзбекистон Хотин-қизлар қўмитаси мутасаддилари маълум қилди.
Халқаро кўргазма ихтирочи аёлларнинг фан ва технология соҳасида эришаётган ютуқлари, тажрибалари ва яратган янги технологияларини ўрганиш ҳамда рағбатлантириш мақсадида ўтказилиб келинмоқда. KIWIE 2018 кўргазмасида 30 дан зиёд давлатдан 500 нафардан ортиқ ихтирочи хотин-қизлар техника, технология, медицина, озиқ-овқат, енгил саноат, кимё ва саноатнинг турли йўналишлари бўйича ўз ихтиролари ҳамда инновацион ишланмалари билан қатнашди.
Кўргазмада иштирок этган ихтирочи аёллар эришган натижаларини намойиш қилди. Ўзбекистон олима аёлларининг ихтиролари халқаро экспертлар томонидан ўрганилиб, юқори баҳоланди.
Жумладан, профессор Карима Норқулованинг «Болғачали тегирмон» номли фойдали моделига патенти озиқ-овқат саноати йўналиши бўйича олий мукофотни қўлга киритди. Шунингдек, Карима Норқулованинг «Қуритиш қурилмаси» ихтиросига патенти олтин ҳамда «Тугунакларни қуритиш усули» ихтиросига патенти кумуш медални қўлга киритди. Доктор Малоҳат Илҳамованинг «Болалар пойабзали учун профилактик ич патак» номли фойдали моделига патенти ҳамда «Электр ўтказувчан пойабзал» ихтиросига патенти кумуш медалларни ҳамда «Қиз болалар учун туфли» саноат намунасига патенти бронза медални, профессор Парахат Матякубованинг «Сочилувчан моддаларнинг иссиқлик-нам ўлчагичи» ихтиросига патенти кумуш медални қўлга киритди.
Кўргазма доирасида халқаро форум, давра суҳбатлари ўтказилди. Интеллектуал мулк соҳасидаги лидер аёлларнинг академиясида семинар ташкил қилинди. Ўзбекистон делегацияси аъзолари семинарда иштирок этишиб, ихтироларни амалиётга жорий қилиш ва тижоратини йўлга қўйиш бўйича ўз малакаларини ошириб, сертификатлар қўлга киритди.
Изоҳ (0)