Ўзбекистон Бош вазири ўринбосари, хотин-қизлар қўмитаси раиси Танзила Норбоева Каттақўрғонда ИИБ ходими томонидан таҳқирланган аёл хонадонига келиб, у билан кўришгани ҳақида хабар бергандик.
«Дарё» мухбири Фарҳод Норбўтаевга кўра, Танзила Норбоева аёлнинг оилавий шароити билан яқиндан танишиб чиқди. Н.Т. билан суҳбат қурилиб, унинг руҳий ҳолати ўрганилди ва унга лозим пайтда кўмак бериш учун психолог Шаҳноза Мамаюсупова бириктирилди.
Инсон ҳаёти давомида ўзи истаган ва истамаган пайтларда ҳуқуқий ҳимояга муҳтож бўлади. Бу Н.Т мисолида яна бир бор намоён бўлди. ИИБ собиқ ходими Санъат Умаров томонидан таҳқирланган аёлни ҳуқуқий ҳимоя қилиш, унга маслаҳат бериш мақсадида адвокат Азамат Ашурбоев ҳам бириктирилди. Адвокат аёлга тергов-суриштирув жараёнида ҳуқуқий ёрдам беради.
Бундан ташқари, патронаж ҳамшира Нилуфар Ҳайитова, Олмазор маҳалла фуқаролар йиғини хотин-қизлар билан ишлаш ва оилаларда маънавий-ахлоқий қадриятларни мустаҳкамлаш бўйича мутахассис Инобат Эргашева унинг ҳолидан мунтазам равишда мураббий сифатида хабар олиб туради.
Каттақўрғон туман ҳокимлиги хотин-қизлар қўмитасининг таклифини инобатга олиб, аёлга якка тартибдаги тадбиркор сифатида «Ҳар бир оила — тадбиркор» дастури асосида мактаб ўқув қуроллари ва канселярия маҳсулотлари билан савдо қилиш учун кичик савдо дўкони ташкил қилиб бериладиган бўлди.
Фарзандлари эса ҳудудда фаолият кўрсатаётган спортнинг карате тўгарагига жалб этилди.
Каттақўрғон туман ҳокимлиги, ҳудуддаги тадбиркорлар ва маҳалла фаоллари ташаббуси билан аёлнинг уй-жойи таъмирланмоқда. Қурилиш ишлари давомида хонадон атрофи тўлиқ девор билан ўраб берилиши ҳам кўзда тутилган.
Ижтимоий тармоқларда ташкил этилган акциядан тушган маблағ эвазига хонадонга дарвоза ҳам ўрнатилди. Фарзандларига кийим-кечак ва ўқув қуроллари харид қилинади.
Изоҳ (0)