Қишлоқ хўжалиги вазирлиги делегациясининг Жанубий Кореяга ташрифи давомида қишлоқ хўжалиги соҳасида ҳамкорлик бўйича Ўзбекистон — Корея форуми ташкил этилди. Бу ҳақда ЎзА хабар берди.
Тадбирда икки мамлакатнинг қишлоқ хўжалиги, озиқ-овқат соҳаси вакиллари, шунингдек, тегишли вазирлик ва идоралар раҳбарлари иштирок этди. Унда мамлакатларнинг аграр соҳадаги сиёсати, қишлоқ хўжалиги маҳсулотларини қайта ишлаш ва ҳудудлар кесимида тақсимлаш, Ўзбекистонда ўсимлик ва ҳайвонлар карантини тизимини ривожлантириш масалалари муҳокама қилинди.
Учрашувда кореялик ишбилармонларга мамлакатда ишбилармонлар учун яратилаётган шароитлар, имтиёзлар, экспорт учун яратилган қулайлик ҳақида маълумот берилди. Қишлоқ хўжалиги маҳсулотларини ишлаб чиқариш ва қайта ишлаш соҳасида қўшма лойиҳаларни амалга ошириш истиқболлари хусусида сўз юритилди.
Жанубий Корея қишлоқ хўжалиги иқтисодиёти институти қошидаги халқаро алоқалар маркази директори Ли Де Соб мамлакатда етиштирилган мевалар ўзининг мазаси, тотлилиги билан ажралиб туришини таъкидлар экан, ўзбекистонлик ишбилармонлар учун Корея бозорларида рақобатлашиш имконини юқори баҳолади. Биргина мисол. АҚШдан Корея бозорига экспорт қилинадиган бир килограмм гилос ўртача 9,9 долларни, Янги Зеландиядан келтирилган гилос нархи эса 12,5 долларни ташкил этади. Ўзбекистонлик деҳқонлар етиштирган ушбу маҳсулот Корея бозорларида 4,2 доллар баҳоланмоқда.
Учрашувда Корея томони маҳсулотнинг нарх қиймати занжирини яратиш мақсадида экинларни парваришлаш, карантин, ишлаб чиқариш инфратузилмасини модернизациялаш, уруғчилик, транспорт-логистика йўналишлари, хорижий ҳамкорлар кўмагида савдо тармоғини яратиш бўйича ўз таклифларини билдирди.
Изоҳ (0)