Трамп КХДР билан урушнинг олдини олганлиги билан мақтанди

АҚШ президенти Дональд Трамп Шимолий Корея охирги саккиз ой мобайнида ракета учириш ва ядро синовларини амалга оширмаганлигини маълум қилди ва унинг сай-ҳаракатларисиз Вашингтон Пхеньян билан уруш олиб бораётган бўлишини таъкидлаб ўтди. Бу ҳақда у 3 июль, сешанба куни Twitter’даги саҳифасида маълум қилди, деб ёзади «Корреспондент.net».

«Менинг ҳаракатларимсиз, ҳозир Шимолий Корея билан урушаётган бўлардик», — деб ёзди у.

Трамп, шунингдек, КХДР билан музокаралар «яхши» кетаётганлиги, фақат мухолифатчи партиялар шикоят қилаётганлигини қўшимча қилди.

Эслатиб ўтамиз, АҚШ ва КХДР етакчилари илк бор 12 июнь куни Сингапурда учрашди. Саммит якунлари бўйича, Трамп ва Ким Чен Ин икки томонлама алоқаларни ривожлантириш ва Корея яриморолида тинчликка эришиш учун биргаликда ҳаракат қилиш ҳақидаги келишувни имзолади.