Инсон ҳуқуқлари бўйича Европа суди террорчи Андерс Брейвикнинг Норвегиядаги қамоқхона шароитлари устидан қилган шикоятини рад қилди. Бу ҳақда Европа судининг матбуот хизмати хабар берди.
Уч нафар судьядан иборат қўмита маҳбуснинг кўрсатмалари ҳақиқатга мос келмагани туфайли унинг шикояти рад этилганини маълум қилган. Қарорнинг қатъий экани айтилган.
21 йиллик қамоқ жазосини ўтаётган Брейвик бир кишилик 3 хонали камерада яшаши ва бошқа маҳбуслар билан мулоқот қила олмаслигидан шикоят қилган. У бундай муносабатни ғайриинсоний деб атаган.
2016 йилнинг апрелида Осло шаҳридаги округ суди шикоятни қисман асосли деб топиб, маҳбусга компенсация тўланишини белгилаган. Бироқ 2017 йилнинг мартида Боргартинг апелляция суди ҳукмни бекор қилган. Суд Брейвикнинг бир кишилик камерада сақланишини маъқуллаган, негаки маҳбус қилмишидан афсусланмаслигини айтган, демак у ҳануз жамият учун хавф туғдириши мумкин. Кейинроқ, 2017 йили Норвегия Олий суди террорчининг қамоқхонадаги яшаш шароитлари устидан қилган шикоятини асоссиз деб топган.
Қамоқхонада яшаш вақтида маҳбус ўзининг исм-фамилиясини ҳам ўзгартиришга муваффақ бўлган. Эндиликда унинг исми расман — Фьотольф Хансен.
2011 йил 22 июль куни норвегиялик маҳбус иккита терактни амалга оширган. Дастлаб у Осло ҳукумати жойлашган даҳада портлаш содир қилган, натижада 8 киши ҳалок бўлган. Кейинроқ террорчи Утойя оролида 69 кишини отиб ўлдирган. 2018 йили у ўз қилмишидан афсусда эканини маълум қилган, бироқ айримлар унинг гапларини ёлғон деб топган.
Изоҳ (0)