Бухоро вилояти Қоракўл туман маъмурий суди раиси А.Ҳамидов раислигида ташкил қилинган мазкур судда Бухоро вилояти божхона бошқармаси ходимлари, божхона расмийлаштируви бўйича мутахассислар, маҳалла фаоллари ва маъмурий ҳуқуқбузарлик содир этган шахслар иштирок этди. Бу ҳақда божхона қўмитаси матбуот хизмати хабар беради.
Сайёр суд мажлисида божхона расмийлаштируви бўйича мутахассислар ва тадбиркорлик субъектлари томонидан ҳудудийлиги бўйича Қоракўл туманидаги «Қоракўл» ташқи иқтисодий фаолият (ТИФ) божхона постида содир этилган 15 дан ортиқ ҳуқуқбузарликлар юзасидан юритилган иш материаллари кўриб чиқилди.
Ҳуқуқбузарликларни бартараф этиш, бу борада мавжуд таклиф ва мулоҳазаларни ўрганиш, судлар фаолиятини очиқлиги ва шаффофлигини намоён қилиш, фуқаролар ҳуқуқ ва эркинликларини ишончли ҳимоясини таъминлашда сайёр судларнинг аҳамияти жуда ҳам катта.
Сайёр суд якунида Қоракўл туман маъмурий суди раиси А.Ҳамидов аҳолининг ҳуқуқий онгини янада ошириш, фуқароларга ҳар томонлама қулайликлар яратиш бўйича суд идоралари ҳар қандай кўмак беришга тайёр эканлигини яна бир бора билдириб ўтди.
Таъкидлаш жоизки, мазкур сайёр судда кўриб чиқилган ҳуқуқбузарлик ҳолатларида божхона расмийлаштируви бўйича мутахассисларнинг аксарияти божхона органларига тақдим қилинадиган божхона юк декларацияларини тўлдиришда содир этилган хато ва камчиликлари учун жавобгарликка тортилган.
Жавобгарликка тортилганлар орасида бу турдаги ҳуқуқбузарликни илк бора содир этган А.Қ ҳам бор. Унинг моддий аҳволини инобатга олган ҳолда шунингдек маҳалла фаолларининг ушбу шахс ҳақидаги ижобий тавсифномаларидан келиб чиқиб, Маъмурий жавобгарлик тўғрисидаги кодексининг 33-моддасига биноан енгил жазо чораси қўлланилди.
Айниқса, Ўзбекистон Республикаси Президентининг «Тадбиркорлик фаолияти соҳасидаги лицензиялаш ва рухсат бериш тартиб-таомилларини янада қисқартириш ва соддалаштириш, шунингдек, бизнес юритиш шарт-шароитларини яхшилаш чора-тадбирлари тўғрисида» 2018 йил 11 апрелдаги ПФ-5409-сон Фармони муҳокамалар марказида бўлди.
Бизнесни юритишдаги ортиқча бюрократик жараёнларни тубдан қисқартириш, хусусий мулкнинг дахлсизлигини ҳимоя қилиш ва кафолатлашнинг бозор ҳамда ҳуқуқий механизмларини мунтазам равишда изчил мустаҳкамлаб бориш, республикада инвестициявий ва ишбилармонлик муҳитини яхшилашга қаратилган кучларни жамлаш мақсадида қабул қилинган мазкур Фармон божхона брокерларига ҳам қатор қулайликларни тақдим қилмоқда.
Эслатиб ўтамиз, жорий йилнинг 1 июнидан бошлаб, божхона брокери сифатида фаолиятни амалга ошириш учун рухсатнома бериш тартиби бекор қилинган эди.
Изоҳ (0)