Ўзбекистон ва Эрон минтақалараро транспорт йўлагини ташкил этишни муҳокама қилди

«Ўзбекистон темир йўллари» АЖда мамлакатга  келган Эрон делегацияси аъзолари билан учрашув бўлиб ўтди. Унда Бош вазирнинг биринчи ўринбосари, акциядорлик жамияти бошқаруви раиси Ачилбой Раматов ҳамда Эрон йўллар ва шаҳарсозлик вазири Аббос Охундий иштирок этди, дея хабар беради «Халқ сўзи».

Учрашувда икки давлат ўртасида савдо-иқтисодий, қурилиш ва транспорт соҳаларида манфаатли ҳамкорликни янада ривожлантириш масалалари муҳокама этилди.

Суҳбат давомида икки давлат темир йўл ташкилотлари ўртасидаги алоқаларни янада юқори даражага олиб чиқиш, ўзаро юк ташиш борасида ҳамкорликни мустаҳкамлаш, автотранспортда ташувларни амалга ошириш тўғрисида ҳам сўз юритилди.

Шунингдек, томонлар Ўзбекистон—Туркманистон—Эрон—Уммон минтақалараро транспорт йўлаги фаолияти борасида ҳам фикр алмашди. Тадбирда икки мамлакат ўртасида янги авиарейсларни жорий этиш масаласига ҳам алоҳида эътибор қаратилди. Бундай имкониятларни яратиш икки давлат халқлари ўртасида борди-келдиларни йўлга қўйиш, сайёҳликни ривожлантириш, маданий алоқаларни юксалтиришга хизмат қилиши таъкидланди.

ОАВ вакилларига берган интервьюсида Аббос Охундий айни пайтда Ўзбекистон кўпгина жиҳатлари билан Марказий Осиёдаги қудратли мамлакат эканлигини таъкидлади. Унинг бой маданий мероси, тарихий обидаларини келиб кўришга эронликларда ҳам қизиқиш юқори эканлигини қайд этди. Шунингдек, тарихий обидаларни қайта таъмирлаш, замонавий шаҳарсозликни ривожлантириш жараёнларида икки мамлакат мутахассисларининг ҳамкорлиги юқори натижа беришига эътибор қаратди.