“O‘zbekiston temir yo‘llari” AJda mamlakatga kelgan Eron delegatsiyasi a’zolari bilan uchrashuv bo‘lib o‘tdi. Unda Bosh vazirning birinchi o‘rinbosari, aksiyadorlik jamiyati boshqaruvi raisi Achilboy Ramatov hamda Eron yo‘llar va shaharsozlik vaziri Abbos Oxundiy ishtirok etdi, deya xabar beradi “Xalq so‘zi”.
Uchrashuvda ikki davlat o‘rtasida savdo-iqtisodiy, qurilish va transport sohalarida manfaatli hamkorlikni yanada rivojlantirish masalalari muhokama etildi.
Suhbat davomida ikki davlat temir yo‘l tashkilotlari o‘rtasidagi aloqalarni yanada yuqori darajaga olib chiqish, o‘zaro yuk tashish borasida hamkorlikni mustahkamlash, avtotransportda tashuvlarni amalga oshirish to‘g‘risida ham so‘z yuritildi.
Shuningdek, tomonlar O‘zbekiston—Turkmaniston—Eron—Ummon mintaqalararo transport yo‘lagi faoliyati borasida ham fikr almashdi. Tadbirda ikki mamlakat o‘rtasida yangi aviareyslarni joriy etish masalasiga ham alohida e’tibor qaratildi. Bunday imkoniyatlarni yaratish ikki davlat xalqlari o‘rtasida bordi-keldilarni yo‘lga qo‘yish, sayyohlikni rivojlantirish, madaniy aloqalarni yuksaltirishga xizmat qilishi ta’kidlandi.
OAV vakillariga bergan intervyusida Abbos Oxundiy ayni paytda O‘zbekiston ko‘pgina jihatlari bilan Markaziy Osiyodagi qudratli mamlakat ekanligini ta’kidladi. Uning boy madaniy merosi, tarixiy obidalarini kelib ko‘rishga eronliklarda ham qiziqish yuqori ekanligini qayd etdi. Shuningdek, tarixiy obidalarni qayta ta’mirlash, zamonaviy shaharsozlikni rivojlantirish jarayonlarida ikki mamlakat mutaxassislarining hamkorligi yuqori natija berishiga e’tibor qaratdi.
Izoh (0)