Япония Ўзбекистонга умумий қиймати 800 миллион иен (7,3 миллион доллар) бўлган йўл-қурилиш техникасини беғараз асосда тақдим этади. Бу Ўзбекистон ва Япония вакиллари ўртасида Тошкентда имзоланган алмашув ноталарида назарда тутилган, дея хабар беради Sputnik.
«Грант лойиҳаси доирасида Ўзбекистон Япониянинг Sakai Heavy Industries компанияси техникасига эга бўлади. Мазкур техникадан Сирдарё, Жиззах, Хоразм вилоятлари ҳамда Қорақалпоғистонда ‘Обод қишлоқ’ дастурини амалга ошириш доирасида йўл-таъмирлаш ишларида фойдаланилади. Ўзбекистонга турли хил йўлсозлик техникалари ҳамда уларнинг эҳтиёт қисмлари тақдим этилади», — деб маълум қилди Япониянинг Ўзбекистондаги элчихонаси.
Маълумот учун, шу йил март ойи бошида Ўзбекистон Хитойда ишлаб чиқарилган 100 дан ортиқ йўл-қурилиш техникасини сотиб олганди. Йил ўртасига қадар яна 100 та йўл-таъмирлаш ва йўл-қурилиш техникасини сотиб олиш режалаштирилган.
Изоҳ (0)