Фарғона вилоятининг Бағдод туманида яшовчи И. Шерматов Мажбурий ижро бюроси ходими томонидан электр энергиясидан дастлаб 230 минг сўм, бироз муддат ўтгач эса, 1 миллион 800 минг сўм қарз экани ҳақида огоҳлантирилди. Бу ҳақда «Дарё» мухбири хабар бермоқда.
Ноҳақ ҳисобланган қарздорликдан норози бўлган И. Шерматов электр таъминоти корхонасига муаммога аниқлик киритишларини сўраб, бир неча бор мурожаат қилди. Муаммо ҳал бўлмагач, Халқ қабулхонасига ариза ёзди. Ариза ўрганиб чиқиш учун туман истеъмолчилар ҳуқуқларини ҳимоя қилиш жамиятига юборилди.
Жамият мутахассислари томонидан фуқаро хонадонига ўрнатилган 4 хонали ҳисоблагич электр таъминоти корхонаси ходимларининг хатоси туфайли ҳисоб дастурига 5 хонали ҳисоблагич сифатида киритилгани аниқланди.
Қайта ҳисоб-китоб амалга оширилиши натижасида истеъмолчи 1,8 миллион сўм қарз эмас, балки 63 минг 537 сўм ҳақдор экани ўз исботини топди.
Изоҳ (0)