Ироқ собиқ раҳбари Саддам Ҳусайннинг Basrah Breeze («Басра шабадаси») номли суперяхтасини сота олишмади ва уни меҳмонхонага айлантиришди, деб ёзади Reuters.
Яхта уруш вақтида ўқлардан зарар кўрмаслиги учун 2003 йилда Саудия Арабистонига олиб кетилган, у ердан 2010 йилда қайтариб олиб келинган ва 30 миллион долларга сотувга қўйилган. Бир неча йиллар давомида кема учун харидор чиқмаган, охир-оқибат, мамлакат ҳукумати уни меҳмонхонага айлантиришга қарор қилган.
1981 йилда сувга туширилган яхтада меҳмонлар учун 17 та кичик каюта, экипаж учун 18 та каюта, шунингдек, емакхоналар, ётоқхоналар ва Саддам Ҳусайн фойдаланган бошқа хоналар бор.
Ироқ ҳукумати қарори билан яхта Басрада ироқлик денгизчилар учун хизмат қилади, улар рейслар оралиғида бошқа жойларга боришга вақт кетказмаслик учун меҳмонхона яхтада дам олиши мумкин: денгизчиларнинг кўпчилиги соҳилбўйидан анча олисдаги шаҳарларда яшайди.
Изоҳ (0)