Ўзбекистон Ташқи савдо вазирлиги Президент Шавкат Мирзиёевнинг АҚШга ташрифи чоғида бир қатор ҳужжатларни имзолади. Бу ҳақда вазирлик матбуот хизмати хабар берди.
Хусусан, АҚШ савдо вазирлиги билан савдо алоқаларини кенгайтириш бўйича ҳамжиҳатлик ҳақида меморандум имзоланди. Ҳужжат ишбилармон доиралар ўртасидаги бевосита алоқаларни ривожлантириш ва уларнинг икки давлат ҳудудларидаги инвестициявий фаолиятини рағбатлантиришни кўзда тутади.
Томонлар Ўзбекистон вакилларининг қуйидаги Америка дастурларидаги иштирокини қайта тиклашга келишиб олди:
- Тижорий ҳуқуқни ривожлантириш дастури;
- Ишбилармонлик стажировкалари бўйича Америка махсус дастури (САБИT);
- Америка бизнес-ассоциациялари билан ҳамкорлик дастури.
Openbucks Corp. тўлов компанияси билан ҳам ўзаро ҳамжиҳатлик ва Ўзбекистонда электрон савдони ривожлантириш бўйича ҳамкорлик ҳақида меморандум тузилди. Ўзбекистонда электрон тижоратни ривожлантириш бўйича ҳамда ўзбек тадбиркорларининг глобал савдо платформалари ва электрон тўлов тизимларидан фойдаланиш имкониятини кенгайтириш бўйича «йўл хариталари»ни тайёрлаш режалаштирилмоқда. Айни пайтда интернет орқали маҳсулот ва хизматлар сотиш билан шуғулланувчи Amazon раҳбарияти билан музокаралар олиб борилмоқда.
Ўзбек маҳсулотининг АҚШ бозорига узлуксиз етказиб берилишини таъминлаш учун WCC International компанияси билан ўзбек тўқимачилик ва бошқа маҳсулотларини сертификатлаш бўйича лойиҳани амалга ошириш ҳақида келишиб олинди. Бундан ташқари, Ўзбекистонда органик пахта етиштириш бўйича халқаро дастурни жорий қилиш кўзда тутилмоқда.
Изоҳ (0)