Инновацион ривожланиш вазирлиги ва Huawei Tech Investment Tashkent хорижий компанияси ўртасида ўзаро англашув меморандуми имзоланди. Бу ҳақда ЎзА хабар бермоқда.
Ўзбекистон делегациясининг ушбу компаниянинг Шэньчжэнь шаҳридаги (Хитой) штаб квартирасига ташрифи доирасида имзоланган меморандум вазирлик ва Huawei Tech Investment Tashkent хорижий компанияси ўртасида телекоммуникация ҳамда мамлакат иқтисодиётининг бошқа истиқболли соҳаларига инновацион ечимлар ва технологияларни жорий этишга йўналтирилган ҳар томонлама ҳамкорликни кўзда тутади.
Huawei компаниясининг эксперт имкониятлари вазирликнинг илмий-тадқиқот салоҳиятини ошириш имконини беради. Технопарк ва инновацион марказлар концепцияси биргаликда ишлаб чиқилади, «ақлли шаҳарлар» барпо этиш жараёнига илғор технологиялар жорий қилинади.
Инновацион ривожланиш вазирлиги, хусусан, Huawei компанияси кўмагида мамлакатнинг ҳар бир ҳудудида юқори технологик марказ ва лабораториялар очишни режалаштирмоқда.
Айни пайтда Ўзбекистонда ишлаб чиқаришнинг турли соҳалари самарадорлигини оширишга қодир инновацион ечим ва ишланмаларни жорий этишга алоҳида эътибор қаратилмоқда.
Бундай технологик янгиликлар мавжуд ишлаб чиқариш жараёнларини ўзгартириш, уларнинг чиқитсиз ишлашини таъминлаш, харажатлар ва яроқсиз маҳсулотнинг салмоқли фоизини камайтиришга имкон беради.
Изоҳ (0)